سؤال واحدة بتقول أنا طالبة متدينة وعلى وشك التخرج وأحب زميل لي ولكن لا يعرف باب الكنيسة ومهزار وفاشل؟

سؤال:

واحدة بتقول: أنا طالبة جامعية، مؤدبة، ومتدينة، وعلى وشك التخرج. ولكن المشكلة إنّي أحب زميل لي في الكلية، وفيه هذه الصفات:

1. لا يعرف باب الكنيسة فين، وهذا شيء يضايقني.

2. مهزار وفاشل في دراسته.

3. لا يحترم كلامه وغير مهذب.

وأهلي يقدمون لي عريس كويس ماذا أفعل وأنا أحب هذا الشاب؟ ^[1]

الإجابة:

أنا متهيأ لي السؤال ده باعته أهلها، لأن البنت مش ممكن تقول كده! مش ممكن بنت متدينة ومؤدبة تقع في محبة شاب بهذه الصفات. لأن لو متدينة، التدين بيقول إن الشخص لا يجلس في مجالس المستهزئين ولا يمشي في طريق الخطاة. فإذا كان هو من المستهزئين، يبقى إزاي تمشي فيه؟! وإذا كانت إنسانة متدينة، تحب مَن يحبه الله ومَن يحب الله، ولكن لا تتعلق بإنسان لا يعرف طريق الكنيسة، وغير مهذب، ولا يحترم كلامه، وغير مؤدب، وفيه الصفات اللي بتقول عليها.

فيه فرق بين ساعات فيه ناس يُعجبوا بشخص ظريف أو بينكّت أو خفيف الروح، فيختلط على الفتاة وتظن إن هذا حب في قلبها، وربما تكون معجبة بالنكت اللي بيقولها، مش بيه هو.

الحياة المشتركة في الزواج، لا بد تكون بين حياة اتنين متدينين بيعيشوا مع بعض، بيكوّنوا بيت مسيحي كامل، يعمل فيه روح الله. ولذلك إحنا قبل الزواج، بناخد اعتراف وتوبة العريس واعتراف وتوبة العروس، والاتنين يتناولوا قبل ما يتجوزوا. ليه بيعترفوا ويتناولوا قبل ما يتجوزوا؟ عشان يكونوا اتنين قديسين، فيهم روح الله، قوم ساعة الزواج روح الله يعمل فيهم ويوحدهم.

لأن مش معقول إنسانة متدينة وإنسان ملخبط في حياته الروحية يشتركوا إزاي؟! بيقول لك: «أَيَّةُ شَرِكَةٍ لِلنُّورِ مَعَ الظُّلْمَةِ؟ أَمْ أَيُّ اتِّفَاقٍ لِلْمَسِيحِ مَعَ بَلِيعَالَ؟» (2كو 6: 14-15). إزاي تُبقى شركة حياة؟! ولو إنسان من هذا النوع، إنسانة متدينة تعيش معاه إزاي؟! جايز لا بتاع صيام ولا بتاع كنيسة، وهي عايزه تصوم، ومش بتاع الكنيسة وهي عايزه تروح الكنيسة، ومش بتاع صلاة وهي عايزه تصلي. وجايز عايز يفتح الراديو و Televisionكل ساعة والتانية، وجايز عايز يهيّص، يقول لها: «اخرجي معايا نروح السينما»، «اخرجي معايا نروح المسرح». تعيش معاه إزاي؟!

أنتِ يا بنتي، لو كنتِ متدينة بصحيح، لازم تتجوزي واحد متدين عشان تقدري تعيشي معاه. وسيبك من الإعجابات الصبيانية بتاعت سن المراهقة دي.

^{[1] سؤال أجاب عنه قداسة البابا شنوده في عظة بعنوان “الضمير والإرادة” بتاريخ 8 سبتمبر 1978م}