سؤال أخدت فلوس من حق الشركة واعترفت وأبونا قال له تتصدق بالمبلغ على الفقراء أو تحطه في صندوق الكنيسة ولكن لم أقتنع بذلك؟

سؤال:

واحد بيقول: أرسلت خطابي ده قبل كده. اللي حصل يظهر إنه خد فلوس بدون وجه حق من الشركة اللي هو فيها، واعترف لأب اعترافه، وخرج هو من الشغل. قال له: تتصدق بالمبلغ على الفقراء أو تحطه في صندوق الكنيسة، ولكن لم أقتنع بذلك؟ ^[1]

الإجابة:

لازم المبلغ اللي خدته من الناس يرجع للناس. المبلغ اللي أخدته من الناس بطريقة غلط يرجع لنفس الناس. بأي طريقة، ولو تعمل حوالة بريدية ولا أي حاجة، بأي طريقة وتبعتها، حتى ولو بالآلة الكاتبة، ما تبينش هي فين وجاية منين. ومن أي صندوق بوسطة هيوصل وبس، إذا ما كنتش عايز الحكاية تنكشف؟

لكن تروح للكنيسة؟ لأ، الكنيسة لا تقبل إطلاقًا أموالًا تأتي من حرام، مستحيل. يعني قانون الكنيسة يُحرّم إن مال غير طاهر يدخل إلى الكنيسة. فإذا كان مال واحد أخده بطريقة غير سليمة، الكنيسة لا تقبله.

أما على حكاية الفقرا، اسمك ريّحت نفسك إن المال الحرام مش في جيبك، لكن في نفس الوقت صاحب المال ما أخدوش. بقدر إمكانك رجّعه لصاحب المال، يبقى الرجل خد حقه، ما تبقاش أنت ظالم غيرك في شيء.

^{[1] سؤال أجاب عنه قداسة البابا شنوده في عظة بعنوان “العظة على الجبل – أنتم ملح الأرض أنتم نور العالم”، بتاريخ 10 ديسمبر 1986م}