سؤال عائد البنوك هل هو حرام أم حلال؟

سؤال:

عائد البنوك هل هو حرام أم حلال؟ علمًا بإني أُخرِج منه العشور إلى الكنائس وأخوة الرب؟ ^[1]

الإجابة:

إحنا هنشوف حلال ولا حرام، ملناش دعوة بتدّي منه عشور ولا لأ! مش أكمنك بتدّي عشور نقول حلال، لأ.

الربح الذي يأتي من البنوك حلال. لماذا؟

لأن البنوك بتأخذ المال اللي بيوضع فيها وبتستغله في أعمال استثمارية وبيجي لها ربح منه، فأنتوا لما بتاخدوا من ربح البنوك كأنكوا شركاء في رأس المال اللي البنك بيستثمره، فالبنك بيربح من المال ده وبيدّيكوا النصيب بتاعكم من الربح. وعلشان ما يبقاش هذا النصيب كل مرة مختلف عن الأخرى، حددوا سعر معين، إن زاد في سنة وقل في السنة التانية البنك بيوضّب حكايته، لكن يُعتبر الإنسان شريك في رأس المال الذي يستثمره البنك.

إنهو الربا الحرام؟ الربا الحرام لما تسلِّف واحد فلوس وهو محتاج وتاخد منه ربا. يبقى كأنك بتقطع من لحمه وده حرام، لأنه هو ما بيستثمروش، ده رجل غلبان ومعذور. فلما تسلِّف واحد فلوس، ما تاخدش منه عائد! لكن إذا ادّيت للبنك، البنك بيستثمره، وإلا يبقى أنت بتتبرع بهذا العائد للبنك لأن البنك فقير ومحتاج وغلبان ومش قادر يسدد أجور الموظفين.

أما كون إنك تعطي العشور منه؛ فكل إيراد يجي لك مفروض تعطي العشور منه، كل إيراد حلال، لكن الكنيسة ترفض أن تأخذ من المال الحرام، يعني لو واحد بيكسب مال حرام ويدّي الكنيسة، الكنيسة ترفضه. الكتاب بيقول في المزمور: «زَيْتُ الْخَاطِئِ لَا يَدْهَنُ رَأْسِي» (مز141: 5).

^{[1] سؤال أجاب عنه قداسة البابا شنوده في عظة بعنوان “الحق والإدانة”، بتاريخ 5 نوفمبر 1986م}