سؤال أنا لا أعرف أن أُميّز الأفكار ومعرفة ما إذا كانت من الله أم من الشيطان أم من داخلي؟

سؤال:

واحد بيقول: سمعت من عظتكم المباركة يوم الأربعاء الماضي، عن وجوب تمييز الأفكار، وامتحان الأرواح، ومعرفة إذا كانت من الله أم من الشيطان. لكنّي لا أعرف أن أُميّز الأفكار، ومعرفة ما إذا كانت من الله أم من الشيطان أم من داخلي. فكيف لي أن أتسنى أن أعرف ذلك؟ ^[1]

الإجابة:

الفكر الذي من الله تمتحنه أولًا بوصايا الله؛ هل يوافق الوصية أم لا يوافق، يوافق الوصية أم لا يوافق، فإذا كان لا يوافق وصايا الله، يبقى مش من الله.

تاني حاجة: الفكر تختبره بمدى اتفاقه مع طبيعتك ومع قدراتك وإمكانياتك. فإذا كان فكر كويس لكن ليس من مستواك، أعلى منك أو أعلى من مقدراتك، يبقى ما تقدرش تنفذه. ما تقولش: ده من ربنا! جايز فكر تطرف، جايز ضربة يمين، جايز الشيطان عايز يشغلك بحاجة أنت مش قدها عشان يتعبك وييأسك. الحاجات دي لازم تشاور فيها.

تقدر تختبر الفكر أيضًا بالصبر والصلاة. تستنى عليه شوية، وتصلي من أجله، وتشوف الفكر ده يثبت أم لا يثبت. تقدر تميز الفكر بالحكمة، بالحكمة، بالتمييز، بالذكاء، بالفكر السليم يعني. تقدر تميز الفكر بالمشورة؛ إنك تشاور وغيرك يقول لك إن كان الفكر ده من الله ولا مش من الله.

الفكر اللي من الشيطان بيكون فكر لهوجة، سريع وعايز يمشّيك بسرعة من غير ما تصلي، من غير ما تشاور، من غير ما تصبر، من غير ما تفكر، يجرّيك جري كده. أو فكر من الشيطان قصده المجد الباطل؛ يجي لك فكر يكبّرك، يعظّمك، يهيئك، يهندمك، يعمل لك حاجات زي كده. وامتحان الأفكار في كتاب حروب الشياطين، تقدر تقرا فيه كلام كتير عن امتحان الأفكار.

^{[1] سؤال أجاب عنه قداسة البابا شنوده في عظة بعنوان “الحق والإدانة”، بتاريخ 5 نوفمبر 1986م}