سؤال بيقول أنا طالب بالثانوية عندما أُذاكر أحس بقلق نفسي شديد وأثناء الشرح أسرح فماذا أفعل؟

سؤال:

واحد بيقول: أنا طالب بالثانوية، عندما أُذاكر أحسّ بقلق نفسي شديد وأترك الكتاب. وعندما يشرح المدرس في حصته أفكر في أشياء أخرى بعيد عن الدرس، ولا أستوعب كلامه. فماذا أفعل لكي أبعد عن هذا القلق؟ ^[1]

الإجابة:

لازم تحط في نفسك إنك أنت على نمرة واحدة ممكن تفقد الكلية اللي أنت عايزها، على نمرة واحدة. صدقوني، السنة دي، في طلبة جابوا 90% وما قدروش يخُشّوا كلية طب 90%! ده كان اللي يجيب 90% بيدّوا له مرتب أثناء ما هو طالب، وجايز بيدوا له برضو، وما يقدرش يخُشّ الكلية اللي هو عايزها، عايزه كمان نص، مش عارف داخّلينهم بـ 290,5 ولا بـ 291.

يعني لما تحط في نفسك إن على نمرة تقدر تخُشّ الكلية اللي أنت عايزها وعلى نمرة ما تقدرش، تقول: ده أنا لازم أبذل كل جهدي، لأن مجرد نمرة ممكن تضيَّع دراستي وممكن تضيَّع آمالي في الحياة. وممكن تلاقي نفسك لو ما ذاكرتش، لو استمريت ده أنت يا بتاع القلق أنت. لو استمريت على كده تلاقي نفسك محروم من الناس اللي بيخُشّوا في الدفعة الأولى من التنسيق، ومن الدفعة التانية، ومن الدفعة التالتة، وتقعد في الرابعة، وتتردد على أبواب المعاهد، ومعاهد لا طايل جامعة ولا ثانوي، وفي الوسط وحاجة تبقى تعبان أوي.

أنت إيه هتستفيد إيه من اللي أنت فيه؟ أنت لازم تضغط على نفسك شوية، لازم تضغط على نفسك شوية، تقول: لازم أذاكر، لازم أدوَّر على مستقبلي، لازم أشوف هبقى إيه أنا السنة الجاية؟ واضغط على نفسك.

حكاية الضغط على النفس دي نقولها النهارده بمناسبة الصوم. وإن ما ضغطتش على نفسك، خلّي حد تاني يضغط عليك، يعني ما عرفتش توضَّب نفسك، خلّي أبوك يوضَّبك، خلّي أمك توضَّبك، قل لنفسك: اليوم اللي مش هذاكر فيه مش هتغدا فيه، مش هتعشى فيه.

افرض على نفسك عقوبات، خلّيك شديد، لكن التهاون كده ومش قادر، وقلقان وتعبان وبسرح، طب اسرح بقى، وجايز بعد كده تسرح على عربية ولا حاجة.

^{[1] سؤال أجاب عنه قداسة البابا شنوده في عظة بعنوان “الصوم والجسد”، بتاريخ 26 نوفمبر 1986م}