سؤال أرجو تفسير عدم أكل السمك والأسماك ومشتقاتها في يوم الأربعاء والجمعة على مدار السنة؟

سؤال:

واحد بيسأل بيقول: أرجو تفسير عدم أكل السمك والأسماك ومشتقاتها في يوم الأربعاء والجمعة على مدار السنة، ليس في الأصوام فقط، علمًا إن أغلب الشعب القبطي لا يأكل الأسماك ومشتقاتها إلا في هذين اليومين – ده أنتوا بس – ولقداستكم الشكر؟ ^[1]

الإجابة:

كان زمان الناس اللي بياكلوا السمك يوم الأربع والجمعة، لقلة التعليم الكنسي. لكن لما انتشرت التعاليم، أصبح مفيش ناس أبدًا يأكلوا سمك يوم الأربع والجمعة. لأن إذا كان الواحد ياكل لحم في كل أيام الأسبوع، والأربع والجمعة ياكل سمك، ما هو السمك لحم برضو! فما دام السمك لحم، وما دام السمك كائن حي، ده أنتوا تستغربوا إزاي بياكلوا السمك في الأصوام لأنها كائنات حية، مش ليه ما ياكلوش؟

فنتيجة لأن أصوام الكنيسة أزيد من نص أيام السنة، كتير خالص، فمحاولة للتسهيل عليهم في هذه الأصوام الطويلة، سُمح بالسمك في بعض الأصوام من الدرجة الثانية. لكن الأصوام الأساسية اللي هي من الدرجة الأولى في الكنيسة: صوم الأربعين المُقدسة، أسبوع الآلام، الصيام الكبير كله، الأربع والجمعة، دول مش ممكن أبدًا يتاكل فيهم سمك، ولا أيضًا يونان لأنه ماشي في طقس الصيام الكبير، ولا البرامون.

وغير كده، بيسمحوا للتخفيف بأكل السمك في الأصوام العادية، ولكن الأربع والجمعة لأ، لأن دي من أقدم أصوام الكنيسة المُقدسة، وبنتذكر فيها آلام المسيح والتآمر عليه. مش معقول وإحنا بنتذكر آلام المسيح، نقعد ناكل سمك ونرفه نفسنا في أيام الصيام؟!

^{[1] سؤال أجاب عنه قداسة البابا شنوده في عظة بعنوان “العظة على الجبل – فليضيء نوركم قدام الناس”، بتاريخ 24 ديسمبر 1986م}