واحد بيقول رجاء التفضل بإعطائي فكرة عن مَن هم شهود يهوه حيث إنهم يقومون بالتبشير في المنطقة؟

سؤال:

واحد بيقول: رجاء التفضل بإعطائي فكرة عن مَن هم شهود يهوه حيث إنهم يقومون بالتبشير في المنطقة؟ ^[1]

الإجابة:

 أنا اتكلّمت كتير عن الموضوع ده وإن شاء الله هطلع لكوا كتاب عن شهود يهوه، لكن خلاصة الكلام اللي أقوله لكوا إن شهود يهوه ليسوا مسيحيين. خلوا بالكوا من الكلام اللي بقوله ده؛ شهود يهوه ليسوا مسيحيين لأنهم لا يؤمنون بالقواعد الأساسية للمسيحية اللي هي: قانون الإيمان الذي وضعه الآباء القديسون في مجمع نيقة وكُمّل في مجمع القسطنطينية.

والمجمع المقدس عندنا حكم بأن طائفتين ليستا مسيحيتين: شهود يهوه والسبتيين الأدفنتست، وهما الاتنين لا يتفقوا مع القواعد المسيحية الأصلية، وكُلٌّ منهما يشترك في أخطاء مشتركة بينهم وبين بعض، لأن شهود يهوه أصلهم تلاميذ للسبتيين الأدفنتست ولا يؤمنون بالثالوث القدوس ولا بخلود النفس… ولا بالعذاب الأبدي، ويؤمنون بالملكوت الأرضي.. ملكوت على الأرض.

يعني إحنا بنقول: إن الناس الأبرار يُمنحون الأبدية في ملكوت السماوات، هما يقولوا لأ… ممكن يكون ملكوت على الأرض ويبنون بيوتًا ويسكنون فيها إلى آخره …، يعني كأن مش بس كأن ملكوت أرضي وملكوت مادي ويغرسون كرومًا ويشربون منها.

وعقيدتهم في الثالوث القدوس مش مظبوطة: في لاهوت الابن مش مظبوطة… في الروح القدس… مش مظبوطة، كلام كتير، أخطاء كتيرة إن شاء الله هطلع لكوا كتاب ضد شهود يهوه.

أحسن حاجة بالنسبة لشهود يهوه لا تقبلوهم في البيت إطلاقًا، ويوحنا الرسول مع إنه اتكلم كتير عن المحبة.. يقول: “إِنْ كَانَ أَحَدٌ يَأْتِيكُمْ، وَلَا يَجِيءُ بِهَذَا التَّعْلِيمِ، فَلَا تَقْبَلُوهُ فِي الْبَيْتِ، وَلَا تَقُولُوا لَهُ سَلاَمٌ لأَنَّ مَنْ يُسَلِّمُ عَلَيْهِ يَشْتَرِكُ فِي أَعْمَالِهِ الشِّرِّيرَةِ” في آخر الرسالة الثانية ليوحنا.

وخصوصًا إن عندهم ترجمة للكتاب المقدس تغاير الترجمة اللي عندنا، اسمها (The New World Bible) يعني كتاب العالم الجديد، بيحاولوا يحوروا في الآيات لكي تتفق مع مبادئهم وعقائدهم الخاطئة، ابعدوا عنهم وإن شاء الله هطلع لكوا كتاب عليهم.

^{[1] سؤال أجاب عنه قداسة البابا شنوده في عظة بعنوان “مخافة الله ومحبته” بتاريخ 3 يونيو 1992م}