سؤال واحد بيقول بنت أخته سألته ليه ربنا مخلقناش نعيش معاه في السما على طول؟

سؤال:

واحد بيقول سألتني بنت أختي 9 سنوات، – بنت أخته عمرها 9 سنوات -، سألتني سؤال حيرني ولم أستطع الرد عليها قالت لي: ليه يا ميشو – هو بنت أخته ده يبقى خالها كان أصول تقول لك يا أنكل ولا حاجة -، ليه يا ميشو ربنا ما خلقناش نعيش معاه على طول في السماء، وما كانش يخلقنا خالص نعيش على الأرض؟ ^[1]

الإجابة:

لازم تقول لها في السماء ما بيولدوش عيال، فلو كان أبوكي وأمك في السماء ما كانوش خلفوا عيال وما كنتيش اتولدتي خالص دي أول حاجة.

هي فاكرة لازم كل واحد بيتخلق على طول مش بيتولد، هي بتتولد.

ثاني حاجة ربنا بيخلينا نقعد على الأرض فترة من الزمن يختبرنا فيها نمشي كويسين ولا لأ، وإذا بقينا كويسين وطاوعنا كلامه يطلعنا في السماء، لأن فيه عيال صغيرين بيمشوا مش مظبوط.

بيقول: فلم أستطع الرد عليها ردًا مقنعًا، وقلت لها أي رد لم أكن أنا نفسي مقتنع بيه. لأ قل لها، قل لها: في السماء ما بيولدوش عيال، وكويس إنك أنتِ اتولدتي على الأرض وإلا ما كُناش شوفناكي.

^{[1] سؤال أجاب عنه قداسة البابا شنوده في عظة بعنوان “الأربعين يومًا بعد القيامة” بتاريخ 29 أبريل 1992م}