سؤال هل سيحاسب الله في نفس اللحظة اللي يفارق فيها الإنسان الحياة ولا في الآخرة وهل سأتعرف على أبي وأمي؟

السؤال:

واحد بيقول: هل سيحاسب الله في نفس الدقيقة اللي يفارق فيها الإنسان الحياة ولا في الآخرة؟ وهل في الآخرة سوف أتعرف على أبي وأمي؟ ^[1]

الإجابة:

لا، هتتعرف عليهم قبل الآخرة. هقول لك يعني إيه؟

تتعرف عليهم قبل الآخرة لأن الناس لما ينتقلوا من هذه الحياة هيقابلوا الأرواح الأخرى ويتعرفوا عليها، وطبعًا مش معناها والدك ووالدتك مثلًا اتوفوا وأنت هتتوفى بعد كده فتستنى تيجي الآخرة، بعد ما تموت إن شاء الله بعد عمر طويل، هتبقى تتعرف عليهم وجايز الآخرة تكون لسه ما جاتش.

زي مثلًا ما لعازر وإبراهيم والغني اتعرفوا على بعض ولسه الآخرة ما جاتش، فممكن لما تلتقي الأرواح يتعرفوا على بعض وما يهمش جات الآخرة ولا لسه.

لكن هل الحساب…؟ الحساب في يوم الحساب في يوم الدينونة. وده لسه ما جاش لكن أول ما الواحد يخرج يحس بنفسه كويس، يحس بنفسه كويس، “وَأَعْمَالُهُمْ تَتْبَعُهُمْ” (رؤ14: 13)، يبص يلاقي أعماله طلعت له كده، صورها كلها قصاده فيبقى هو بيدين نفسه وفاهم حكايته قبل ما الدينونة العامة تيجي.

أُمال يعني إيه “أَعْمَالُهُمْ تَتْبَعُهُمْ” (رؤ14: 13)؟ تقول لي: طب يعني الخطايا اللي عملتها في حياتي تكون لازقة فيَّ أول ما أموت؟ أقولك الخطايا اللي تُبت عنها وغُفرت ليك مش هتبقى لاصقة بيك لكن الخطايا اللي ما تبتش عنها هتبقي لاصقة بيك وتبقى دينونتها واضحة أمامك، لكن لسه يوم الدينونة ما جاش.

^{[1] سؤال أجاب عنه قداسة البابا شنوده في عظة بعنوان “السلام القلبي والخوف” بتاريخ 14 أكتوبر 1992م}