سؤال هل العشور يتم دفعها من إجمالي المرتب أم من الصافي بعد سداد مبالغ مثل الإيجار والنور وغيرها؟

سؤال:

واحد بيقول: هل العشور يتم دفعها من إجمالي المرتب، أم من الصافي بعد سداد مبالغ مثل الإيجار، والنور، والجمعية وغيرها؟ ^[1]

الإجابة:

ما هو مفيش حد بيبقى عنده صافي، وجايز يبقى مديون فيقول: لربنا خد العشور بتاعت الديون يعني يبقى ربنا مديون معاه. اللي أقدر أقوله لك إن العشور تُدفع من صافي المرتب بعد الخصومات اللي بتخصمها الدولة، يعني الدولة بتخصم حاجات ضرائب وحاجات زي كده، وتأمينات وغيره، وبيبقى لك صافي، فتدفع العشور من صافي المرتب اللي بتستلمه، لكن صافي بعد المصاريف ما هو مش هيفضل حاجة، ده ناصح قوي الرجل ده!! عايز يتشطر على ربنا نفسه.

وبعد كده بيقول: هل لو كان أبي وأمي في حاجة ضرورية للمال؟

يعني بعد ما يصفى الجزء ده يدي أبوه وأمه. طب وبعدين هيفضل الباقين إيه؟ زي ما قلت مرة قبل كده إنك ممكن تعطي أباك وأمك من العشور لكن لا تعطيهم كل العشور. لئلا يبقى أنت عندك محبة لعيلتك بس وما عندكش محبة لباقية الناس. أو تخلط بين الواجب الاجتماعي وبين العشور. فممكن تدي والدك ووالدتك لكن متديهومشي الكل تدي الغير أيضًا. 

^{[1] سؤال أجاب عنه قداسة البابا شنوده في عظة بعنوان “ما لم تر عين” بتاريخ 11 نوفمبر 1992م}