سؤال إذا كانت الشياطين لا تتناسل وإن سبب كثرتها هى عدد الساقطين من الملائكة فهل هناك ملائكة ما زالت تسقط؟

سؤال:

واحد بيقول: إذا كانت الشياطين لا تتناسل، وإن سبب كثرتها هي كثرة عدد الساقطين من الملائكة، كما ذكرتم قداستكم في الإجابة على أحد الأسئلة، فهل هناك ملائكة ما زالت تسقط وتخالف وصايا الرب؟ ^[1]

الإجابة:

لا أظن هذا إطلاقًا، والكتاب ما قالناش إن في ملايكة بيسقطوا، لكن الكثرة جات من أول سقوط سقطه الشيطان. الشيطان سقط وأخذ معاه جمهرة كبيرة من الملائكة، دول كُتار.

ومع ذلك، شيطان واحد ممكن يلخبط بلد بحالها، أنتوا يعني فكركوا لازم كل واحد ليه شيطان؟ لا أبدًا، دول الشياطين دول جبابرة. ممكن شيطان واحد يلخبط بلد، ممكن شيطان واحد في ذهن إنسان يجيب له بدعة أو هرطقة تكفر جيل بحاله وأجيال عديدة. مُجرد فكرة من شيطان وشيطان واحد، يعني المسألة مش زي ما أنتوا فاكرين. فالشياطين كُتار، لكن مش كُتار نتيجة تناسل.

ثم التناسل، إيه اللي هيتناسل؟ أنا عايز أعرف إيه اللي هيتناسل؟ الملايكة دول أرواح. الملايكة إيه؟ أرواح، «الَّذِي خلق مَلَائِكَتَهُ أَرْوَاحًا، وَخُدَّامَهُ نَارًا مُلْتَهِبَةً» (عب1: 7)، والكتاب بيسميهم أرواح شريرة أو أرواح نجسة. الأرواح دي بقى بتتناسل إزاي؟ إزاي روح من روح تتناسل؟ يا ريت تدوني خبر، لأن أنا مش عارف، إزاي الأرواح بتتناسل يعني؟

في ساعات ناس يسألوا أسئلة، لكن لو دخلوا إلى عمقها، يلاقوا نفس الكلام مش باين ليه معنى. يقول لك الشياطين تتناسل، طب يعني إيه تتناسل؟ هل شيطان يتناسل من شيطان؟ لأ، لأن الجنس مش موجود عند الشياطين. ده بيقول: «لَا يَتَزَوَّجُونَ وَلَا يُزَوِّجُونَ، بَلْ يَكُونُونَ كَمَلَائِكَةِ اللهِ فِي السَّمَاءِ» (مت22: 30)، فالملايكة ما بيتجوزوش. ما تقدرش تقول ده ملاك نتاية وده ملاك ذكر، دي مش موجودة. لا، مش موجودة بصحيح يعني، فمش هيتناسلوا من بعضهم للبعض.

فهل يتناسلوا من البشر؟ مش معقول، أنا قلت لكوا قبل كده إن يُشترط للتناسل إن يكون الطبائع متوافقة. ما يستطعش طائر يتناسل من سمكة، ولا مثلاً حيوان من حيوان آخر من غير فصيلته يعني، ولا حيوان من إنسان، ولا إنسان من حيوان، يعني لازم يكون في توافق في الطبيعة، فمش ممكن الشيطان.

كما إن التناسل فيه مادة للتناسل، مادة من الذكر ومادة من الأنثى بيتحدوا مع بعض. فالشيطان فين المادة اللي فيه اللي تتحد مع مادة بشرية، وهو نفسه روح، فمفيش فيه مادة؟ فمفيش حاجة اسمها تناسل عند الشياطين.

إن سمعتوا كلام زي كده، بعقلٍ افحصوه، وزي ما قلت لكوا عظة منذ شهور: «امْتَحِنُوا الْأَرْوَاحَ» (1يو4: 1)، «امْتَحِنُوا كُلَّ شَيْءٍ. افحصوا كل شيء. تَمَسَّكُوا بِالْحَسَنِ» (1تس5: 21)، هكذا يقول الكتاب.

^{[1] سؤال أجاب عنه قداسة البابا شنوده في عظة بعنوان “العظة على الجبل – فَلْيُضِئْ نوركم قدام الناس”، بتاريخ 24 ديسمبر 1986م}