سؤال أنا رجل بعمل في المعمار وما أقدرش أصوم انقطاعي؟

سؤال:

واحد بيقول: أنا رجل بعمل في المعمار، في مهنة في المعمار، وأنا ما أقدرش أصوم انقطاعي؟ ^[1]

الإجابة:

ده أنت تقدر قوي! بقى بتوع المعمار دول ما يعرفوش يصوموا انقطاعي؟ ده بتوع المعمار صحتهم زي الحديد.

شوفوا، في ناس بتشتغل في المعمار، بيمسك القصعة كده اللي ما يقدرش يمسكها 3 رجالة، ويطلع بيها ويحطها. معمار! لأ، تقدر، ما تخافش أبدًا، بس صوم وأنت تلاقي نفسك بقيت تمام. لأ، جرَّب، جرَّب هتلاقي نفسك بتعرف تصوم. هما بس بيخوِّفوا الناس من كده.

تعرف إنك أنت في بتاع المعمار ده لو كلت أكلة جامدة الصبح ومعدتك مليانة، كل ما تطلع فوق السقالة تلاقي معدتك بتلق كده من اللي جواها، لكن لما تكون خفيف وطالع ولا يجري لك حاجة. يعني ممكن سواء كنت بنَّاء تكون صحتك قوية، أو بتشتغل خرسانة صحتك قوية، أو نجار مسلح صحتك قوية. أو في ناس في المعمار بيشتغلوا بحديد، الشغل في الحديد تلاقي الواحد فيهم عضلاته زي الحديد هو الآخَر. كل شغل المعمار قوي، كل شغل المعمار قوي.

طب ما المسيح كان بتاع معمار برضو لأنه كان نجار، وكان قوي وكان بيصوم بالأربعين يوم، أهو معمار زيك. لأ، صوم! صوم، وربنا يقوِّيك.

^{[1] سؤال أجاب عنه قداسة البابا شنوده في عظة بعنوان “الصوم والجسد”، بتاريخ 26 نوفمبر 1986م}