سؤال واحد بيقول هل الشيطان موجود في كل مكان بالأرض؟

سؤال:

واحد بيقول: هل الشيطان موجود في كل مكان بالأرض؟ ^[1]

الإجابة:

أنا عايز أقولكم حاجة مهمة بمناسبة كلمة الشيطان يعني، هو إحنا دايمًا بنتكلم عن الشيطان وكل جنوده، الشيطان وإيه؟ وكل جنوده، بحيث كما ورد في سفر الرؤيا بيقول: “أبصرت حربًا في السماء، ميخائيل وملائكته بيحاربوا، بتحارب مع الشيطان وملائكته”.

فالشيطان حينما سقط، جرّ معه في السقوط مجموعة ضخمة من الملائكة. الناس اعتادوا أن يسموا كل واحد منهم شيطان، يعني مش لوسيفر أو لوسيفيروس الأصلي، إنما أتباعه كلهم بيسموهم سطاناس اللي منها الشيطان، يعني الناس المقاومين لإرادة ربنا.

فما تقولش الشيطان موجود في كل مكان، تقول: جنود الشياطين، جنود الشيطان الأصلي، موجودين في حتت كتيرة جدًا من الأرض. لكن ما نقدرش نقول شيطان، يعني فرد واحد متشيطن ومالي الدنيا، لأ. يعني كمان ساعات الشخص اللي بيلخبط بيقولوا: ده شيطان. أو على رأي إيليا أبو ماضي، لما بيتكلم على نفسه في قصيدة اسمها «وطن النجوم»، قصيدة أولها:

وطن النجوم أنا هنا، حدد أتعرف من أنا؟

أَرأيت في الماضي القديم فتى جريئًا أرعنا.

يعني على نفسه، لما هو كان قبل ما يروح المهجر وكان طفل صغير بيلعب في لبنان، فقال على نفسه بيقول إيه:

ولكم تشيطن كي يقول الناس عنه تشيطنا؟

يعني هو بيتشيطن، يتشاقى، عشان الناس تقول: يا سلام، الواد ده عفريت، الواد ده شيطان.

ففي ناس بيفتخروا بكلمة شيطان، زي مثلًا الشعراء اللي بيقولوا: شيطان الشعر هو وحي، لكن ليه يسموه شيطان؟ مش عارف، شقاوة، جايز يقصدوا أنواع من الشعر اللي فيها الشعر اللي في الغزل، والشعر اللي في الهجاء، والشعر اللي مليان بالأكاذيب والمبالغات، إلى آخره.

علمًا بإن الشيطان ممكن شيطان واحد يخرب الدنيا، لأن الشيطان له قوى فائقة للطبيعة. أنا أدتها لكم في كلامي عن علم الأرواح.

^{[1] سؤال أجاب عنه قداسة البابا شنوده في عظة بالكلية الإكليريكية بتاريخ 11 فبراير 1992م}