سؤال واحد بيقول نكرر توسلنا وتسألنا بخصوص إلغاء الأطباق بالكنيسة؟

سؤال:

واحد بيقول: نكرر توسلنا وتساؤلنا: ماذا تم في موضوع إلغاء الأطباق بالكنيسة؟ ^[1]

الإجابة:

أنا مش واخد بالي إن في أطباق في الكنيسة، الأستاذ سمير موجود هنا؟ طيب هنقول لهم إن شاء الله يعملوا صناديق تتحَط في الكنيسة، وتتلغي الأطباق.

مسألة الأطباق في الكنيسة مسألة غير لائقة، وبتخلي الناس ينشغلوا عن العبادة بجمع الفلوس. وطبعًا اللي بيجمعوا الأطباق هما نفسهم بيحرِموا أنفسهم من الصلاة ومن العبادة ومن التَّفَرُّغ للقداس. وساعات ينتظر الناس على بال ما تتملي الكنيسة ويجمعوا الأطباق، فيبتدوا يجمعوها في أعز الأوقات قدسية، وطبعًا دي مش لطيفة.

أنا فاكر مرة كنت بصلي في كنيسة وأنا أسقف، ولقيت واحد داخل في الحتة اللي الناس بيتناولوا فيها، ودول ساجدين على الأرض، وده بيشَخْلِل لهم عشان يقوموا من السجود يدفعوا، حاجة مش معقولة!

إن شاء الله نعمل صناديق، وكل واحد يحط في الصندوق كما يشاء، متى يشاء، بدون أن يُعرَف ما يعطيه، كتير ولا قليل. وساعات ناس في الأطباق يحطوا مبلغ كبير علشان يفكوا لهم ويديهم وتبقى حكاية. الحاجات دي كلها لازم تتلغي إن شاء الله، ويبقى مجرد صناديق يحط فيها مَن يشاء ما يشاء، متى يشاء، بدون إزعاج الناس أثناء القداس.

^{[1] سؤال أجاب عنه قداسة البابا شنوده في عظة في كنيسة مار مرقس بمصر الجديدة بعنوان “الروح القدس وعمله في الإنسان” بتاريخ 9 أبريل 1981م}