سؤال واحد بيقول إزاي المسيح هو الله على الأرض والله فوق في السماء أنا حاولت أفهم لكن ما عرفتش؟

سؤال:

واحد بيقول: إزاي المسيح هو الله على الأرض والله فوق في السماء، أنا حاولت أفهم لكن ما عرفتش؟ ^[1]

الإجابة:

هو ربنا موجود في السماء وعلى الأرض موجود في كل مكان. موجود في السماء وعلى الأرض وما بينهما، في كتير من الأوقات أو غالبية الأوقات أو في كل الأوقات ربنا موجود على الأرض واحنا مش شايفينه.

طبعًا ربنا موجود معنا هنا في الاجتماع واحنا مش شايفينه. فإذا أراد الله إن احنا نشوفه لتكن مشيئته، يبقى هو على الأرض وشايفينه وموجود في السماء ومش شايفينه في وجوده في السماء. لكن هو موجود في كل مكان، يعني مثلًا ربنا وهو موجود في السماء كلم موسى النبي على الجبل، وأدى له الوصايا العشر، وشرح له حاجات كتير، وربنا وهو موجود في السماء كلم أبانا إبراهيم وقال له: اترك أهلك وعشيرتك وروح للجبل الذي أُريك إياه (تك12). ومرة ظهر له تاني وقال له: هديك نسل (تك12)، وظهر له في مرات عديدة يعني.

فكون إن ربنا يوجد على الأرض ونشوفه لا يمنع إنه في نفس الوقت موجود في السماء ومش شايفينه دي ما لهاش دخل.

^{[1] سؤال أجاب عنه قداسة البابا شنوده في عظة بعنوان “العثرات” بتاريخ 25 نوفمبر 1992م}