سؤال أنا في فصل إعداد خدام بالكنيسة وأعاني من الانطواء ما علاج الانطواء؟

سؤال:

 أنا في فصل إعداد خدام بالكنيسة، ولكني أعاني من الانطواء وما يترتب عليه من خوف وقلق، فهل أستمر في الفصل وما هو علاج الانطواء؟ ^[1]

الإجابة:

الانطواء؛ يعني شخص لا يتعامل مع المجتمع قافل على نفسه ومش قادر يتعامل.

وليها أسباب كتير في سبب من أسباب الانطواء هو الخجل، إنسان تلاقيه خجول لا يعرف يتكلم ولا يتصرف بطبيعته الخجل بيجيب له انطواء. جايز سببه الخوف واحد بيخاف يغلط، يخاف يتصرف، يخاف يقول حاجة لا يغلطوه الناس فتلاقيه ينطوي على نفسه بسبب الخوف.

فيه انطواء بسبب معاملات سابقة إن واحد جرب متاعب من المجتمع فيبتعد عنه، صديق خانه يبتعد، قال سر لواحد ففشاه يبتعد، يعني تلاقي نتيجة أخطاء موجودة في المجتمع، تعب منه يعني، وفي إنسان عنده انطواء بالنسبة لمجتمع معين، وغير كده بيكون منفتح بالنسبة لناس تانيين، يعني جايز يكون في البيت وأخذ حريته وبره ما بيقدرش يندمج مع الناس.

صاحب السؤال ما دام عنده انطواء ممكن إن تعامله مع الأطفال يخليه ياخد ويدي وينفتح عليهم، إن لقى إنه قاعد يقول الدرس ومقفل خالص ولا بياخد ولا بيدي، يبقى طبعًا مش يصلح مدرس وهيفشل، فلازم الواحد يتعود إزاي يتعامل مع المجتمع، وممكن يتعامل مع مجتمع راقي في الأول، يعني في محيط ناس كويسين لا بيشتموا، لا بيزعقوا، لا بيتخصموا، لا بيتريقوا عليه لغيره ولغيره قوم شوية بشوية يقدر يتعامل مع المجتمعات الأصعب من كده.

^{[1] سؤال أجاب عنه قداسة البابا شنوده في عظة بعنوان “الخلافات بيننا وبين البروتستانت – الإيمان والأعمال + التقليد” بتاريخ 4 أغسطس 1992م}