سؤال أنا فتاة عندي 20 عام وأهلي ضاغطين عليَّ إني أتزوج واحد لا أريده؟

سؤال:

واحدة بتقول: أنا فتاة عندي 20 عامًا، وأهلي ضاغطين عليَّ إني أتزوج واحد هما يعرفوه، وأبي بيقول لي: أنتِ هتخديه، هتخديه – يظهر الواد غني ولا حاجة -، فما العمل؟ ^[1]

الإجابة:

قولي له: مش هاخده، مش هاخده.

شوفي يا بنتي، افرض واحد أنتِ ما بتحبيهوش وما تستريحيش ليه، وهو جَوَّزك الواحد ده، وفشل هذا الزواج وانفصلتوا. يبقى أبوكي في الحالة دي يعمل إيه؟ طرق العافية دي إحنا ما نقبلهاش، وعلى فكرة قوانين الكنيسة تحكم ببطلان الزواج الذي يتم بالإرغام، تحكم ببطلان الزواج الذي يتم بالإرغام. فلا بد الاتنين يكونوا موافقين.

وطبعًا أنتِ بتمدي صباعك والراجل بيحط فيه الخاتم، كُشِّي صباعك وحطيه بعيد. إذا كنتِ مش قادرة وخايفة إنك تخالفي أبوكي، ويكون أبوكي يعني حمش كده زي بلدياتنا، فأحسن، فأحسن حاجة، أحسن حاجة تقولي للولد ده نفسه، يعني: أرجوك أعفيني من الحكاية دي، وأنا لسه صغيرة ومش حمل زواج. صحيح أنا ما ستاهلكش، لكن مش هقدر أتجوز الزيجة دي، وما توقعنيش في مشاكل مع أبويا. وحاولي إنك تتخلصي معاه بطريقة لطيفة.

بس أحسن هو يعجب بيكي نتيجة التصرف ده ويقولك: أنا متمسك. أو شوفي يعني الولد هل هو مرفوض تمامًا ولا فيها نظر؟ لكن الكنيسة تعطيكي الحرية.

إذا ما قدرتيش، دخّلي عمك أو خالك في الموضوع. قولي لأمك، بس ما تكونش أمك يعني طابور خامس بتاع أبوكي! تقولي لها: أنا مش مستريحة.

^{[1] سؤال أجاب عنه قداسة البابا شنوده في عظة بعنوان “العظة على الجبل – أنتم ملح الأرض أنتم نور العالم”، بتاريخ 10 ديسمبر 1986م}