سؤال قداستكم ذكرت في كتاب روحانية الصوم إنه لازم وجود فترة انقطاع في الصوم ولكني تمتلكني عادة شرب الشاي صباحًا؟

سؤال:

واحد بيقول ذكرت قداستك في كتاب روحانية الصوم أنه لا بد من وجود فترة انقطاع في الصوم، ولكن تتملّكني عادة شُرب الشاي صباحًا، فأنا متعود على شرب ما يزيد عن أربع أكواب شاي يوميًا صباحًا، هذا غير ما يزيد عن حاجات تانية كتير أثناء النهار بلاش أقولها لكوا يعني، بيقول: لدرجة إن أنا بنفق 20% من يوميتي يعني هو عامل واليومية بتاعته 20% منها على شرب الشاي فقط، ولقد حاولت كثيرًا التخلص من هذه العادة ولكنني لم أستطع فماذا أفعل؟ ^[1]

الإجابة:

شوف كل حاجة تسيطر عليك وتفقدك حريتك مفروض تبطلها مهما كانت حلال، يعني بولس الرسول بيقول: “كُلُّ الأَشْيَاءِ تَحِلُّ لِي ولكِنْ لَا يَتَسَلَّطُ عَلَيَّ منها شَيْءٌ” (1كو6: 12). ما تخليش حاجة تتسلط عليك، مش الغلطة في شرب الشاي الغلطة إنك فقدت إرادتك وأصبحت مش قادر تسيب الشاي، وأصبح الشاي بالنسبة لك زي السيجارة بالنسبة للي بيدخن، إيه الفرق؟

كمان لا تنسى شيء، الشاي ممكن يزود ضغط الدم عندك، والقهوة ممكن تزود ضغط الدم إذا كانت تناولها بكثرة، بل أيضًا الكاكاو ممكن يزود ضغط الدم، كمية الكافيين إللي موجودة في الشاي، في القهوة، في الكاكاو، ممكن تزود ضغط الدم، يعني تضرك صحيًا أيضًا، تضرك صحيًا. وضغط الدم بيأثر على الدم، وعلى القلب، وخلي الشاي ينفعك بقى! فأنت لما تمتنع عن الشاي تعرف تصوم من جهة، تقوي إرادتك من جهة، تصلح صحتك من جهة أخرى، توضب ماليتك إللي 20% منهم رايحين على الشاي، يعني الشاي دلوقتي بقى زي واحد من ولادك في الصرف عليه ولا زي مراتك يمكن مراتك ما بتاخدش 20% صحيح…

إزاي تبَطل؟

ممكن تحاول إنك تخلي شيء بديل تشربه، مرة تشرب شاي، مرة تشرب قرفة، مرة تشرب عصير، مرة تشرب من الحاجات الأعشاب البرية دي، هما يسموها برضو شاي لكن هي أعشاب برية وصحيًا كويسة، ومرة ما تشربش خالص.

لازم توري إن لك إرادة قوية وأنك تعرف تبطل يعني تعرف تبطل، طب هتعمل إيه في أسبوع الآلام؟ يبقى أسبوع الآلام بالشاي إزاي بقى يعني؟ لازم تبطل اضغط على نفسك، إن ما قدرتش قلل النسبة بدل ما تشرب 4 كوبيات الصبح، اشرب كوباية واحدة بعد كده فصل لك كوباية أو فنجال تكون صغيرة كده، واقنع نفسك أنك خدت كوباية وهي صغيرة تطلع ربع كوباية، ولو تاخد لك شفطة من نفسك وتسيب الباقي، تقول: اديني نفذت وشربت وتسيب الباقي، يعني تقلل الكمية، وتقلل عدد المرات، وما تشربش الكوباية كلها، وما تشربش الكوباية كلها.

في ناس بتوع سجاير بيعمل كده وأنا شوفت أطباء كده ياخد نفس ويحط السيجارة جنبه، وأهي ماشية وهو بيكتب بيعمل بيشتغل وسيبها في حالها يعني، وكل شوية والتانية يفتقدها بنَفس أو نفسين وموجودة…

فحاول أنك أنت تمتنع أو تقلل عدد المرات أو تخلي الكوب صغير أو ما تشربوش كله وشوية بشوية تنتصر، أو تستبدله بحاجة تاني وشوية بشوية ربنا يساعدك من شرب الشاي.

حاجة تاني نصيحة نسيت أقولها لك ما تشربش شاي تقيل، الشاي التقيل هو إللي بيعمل الكيف، في ناس كانوا في الجبل يقول لك: شاي عربي يبقى شاي أسود، أسود بجد وهو ده إللي يكيفه، شاي أسود فأنت ابتعد عن الشاي الأسود، وخلي الشاي خفيف خفيف، يعني ما يبقاش تقيل، إن كنت بتحط فيه ورقة بتاع شاي ما تخليهاش تقعد مدة طويلة يعني أهي تلونه وترميها، ما تعقدش تعصر فيها على الآخر وتاخد كل حقك، خليه خفيف خليه إيه خفيف، ابتعد عن الشاي المغلي ابتعد عن الشاي التقيل. لأن كل دا بيضرك.

^{[1] سؤال أجاب عنه قداسة البابا شنوده الثالث، في عظة بعنوان “حتى المسيح كان له مقاومون”، بتاريخ 8 أبريل 1992م.}