سؤال بيقول هل صحيح ما يقال إنه لو طفل حدث خطأ ما أثناء عماده مثلًا لو عدد الرشومات غير كاملة ممكن يدخل فيه الشيطان؟

سؤال:

واحد بيقول: هل صحيح ما يقال إنه لو طفل حدث خطأ ما أثناء عماده، مثلًا لو عدد الرشومات غير كاملة، ممكن يدخل فيه الشيطان من هذا المكان الذي لم يتم رشمه؟ ^[1]

الإجابة:

الكلام ده ما بيخشش دماغي أبدًا، أبدًا، أبدًا.

طب هقول لك: على حاجة يا ابني. أصل شوفوا إيه أحسن حاجة تفيدكم لاهوتيًا وفكريًا إنك تشوف الكتاب المقدس بيقول إيه؟

دلوقتي سر الميرون بيكون 36 رَشْمَة في كل مفاصل وفتحات الجسم، ليكن. لكن قبل كده كان بياخدوا الروح القدس بوضع اليد، أهو اللي أخد الروح القدس بوضع اليد، ما ترشمش ولا رَشْمَة في أي مفصل أو أي فتحة من جسمه، ده يبقى يخشه الشيطان بقى ولا إيه؟ والسيدات الكبار، لما تعمد ناس كبار؟ إيه… مش معقول الكلام ده، يعني مش معقول. بل إن هذا الأمر ممكن يشكك الناس، ممكن إيه؟ يشكك الناس، وخصوصًا إن ساعات الناس اللي بيعمدوهم وبيرشموهم في أعياد القديسين، لكثرة المئات من الناس، ساعات الكهنة ما بيدققوش أوي في الحاجات دي. فيبقى الشخص راحت عليه ولا إيه؟

ده إحنا كمان مش بس الطفل بنرشمه بالميرون ال36 رَشْمَة، إنما أيضًا بنضع أيدينا عليه، وبننفخ في وجهه، وبنقول له: اقبل الروح القدس. وما ذنب الطفل؟ والشيطان يعني بيدور له بس على فتحة يخش منها، ولا مفصل؟ ده يخش على طول من أي حتة يعني الناس اللي بيصرعهم الشياطين، لازم يلاقي فتحة يخرج منها ولا يخش منها! الشيطان لما بيصرع واحد، بيستولي على عقله وفكره، بيستولي إيه؟ على عقله وفكره. وما أظنش يعني عقله وفكره في فتحة في عقله ولا فتحة في فكره! دي، يظهر بعض الناس بيقرأوا الكتب القديمة وياخدوها زي ما هي ويحطوها بلا مناقشة لاهوتية، يعني بلا مناقشة لاهوتية.

طب حاجة تانية: في العهد القديم مثلًا، ما كانش فيه رشومات ولا حاجة. ده حتى الكهنة حينما كانوا يأخذون الروح القدس، كانوا بيصبوا الزيت، الدهنة المقدسة على رأسهم، وينزل كده زي ما بيقول: “كَالطَّيِّبِ الْكَائِنِ عَلَى الرَّأْسِ، النَّازِلِ عَلَى اللِّحْيَةِ، لِحْيَةِ هَارُونَ، النَّازِلِ إِلَى جَيْبِ قَمِيصِهِ” (مز133: 2)، فبيحط على رأسه وينزل عليه كده، وبياخد الروح القدس. ده في الحالة دي بقى نقدر نقول يعملوا إيه البروتستانت بقى اللي مفيش ميرون خالص؟ ويعملوا إيه الكاثوليك اللي ما عندهمش المسحة بهذا الشكل؟

لو دخلتوا في المسألة دي على الـ Long Run، كده مش هتوصلوا لحاجة غير بلبلة في المخ. صحيح إحنا بنقدس أعضاء الإنسان ونقدس مفاصله بمسحة الميرون، لكن ليس معنى هذا إن لو حدث نقص يدخل الشيطان من حتة.

^{[1] سؤال أجاب عنه قداسة البابا شنوده في عظة بالكلية الإكليريكية بتاريخ 11 فبراير 1992م}