سؤال أرجو أن توضح لنا أنسب طريقة للمذاكرة خلال الأسبوعين القادمين حيث أنني في الثانوية العامة

سؤال:

ناس بيسألوا وبيقولوا:

أرجو أن توضح لنا أنسب طريقة للمذاكرة خلال الأسبوعين القادمين حيث أنني في الثانوية العامة وأرجو أن تدعو ليّ بالنجاح لأنها مرحلة تحوّل هامة في حياتي؟ ^[1]

الإجابة:

ربنا يكون معاك يا حبيبي.

من جهة المذاكرة عايز أقول لكوا شوية ملاحظات. أولًا كويس أن عندكوا امتحانات وجايين تحضروا الاجتماع يعني كتر خيركوا.

أول نصيحة: لا تضيع دقيقة واحدة من وقتك، أول نصيحة: لا تضيع دقيقة واحدة من وقتك، حتى وأنت ماشي في السكة تسمّع لنفسك، تراجع لروحك درس من الدروس، تفتكر حاجة، تجاوب أسئلة مهمة، ما تضيعش ولا دقيقة، اشعر بقيمة كل دقيقة، اشعر بقيمة كل دقيقة، وما تضيعش دقيقة من وقتك.

تاني حاجة: ذاكر بدون ارتباك، خلي نفسيتك مستريحة، واللي تقدر تذاكره ذاكره، ما تحطش قصادك كمية كبيرة بدون إتقان، إنما أي كمية بإتقان أحسن من كتير بدون إتقان، يعني عشرة × صفر = صفر، لكن خمسة × واحد بــ خمسة. فـخلي ليك المذاكرة المُتقنة اللي تستوعب فيها الكلام وتفهمه ما تصُمّش، افهم في الأول وبعدين احفظ، رتب المعلومات قبل ما تدّخلها مخك.

فيه ناس يخططوا، ينمروا المعلومات، يعملوا لها جداول، يلخصوها، كل الحاجات دي بترتب المعلومات قبل ما تدّخلها مخك. اقرأ الحاجة وراجعها وثبتها في ذهنك. إن كان ليك أصحاب مرتبكين ما تفوتش عليهم في الأسبوعين دول. الأمراض النفسية ليها عدوى، يعني ما تفتكرش العدوى في الأمراض الجسدية فقط، العدوى في الأمراض النفسية أيضًا.

يعني واحد يائس يقعد مع واحد تاني ييأسه، واحد خايف يقعد مع واحد تاني يخوفه، واحد متشكك يقعد مع واحد تاني يشككه، المرض النفسي بيتنقل بالعدوى من شخص لشخص، كما أن القدوة الصالحة والفضيلة بتنتقل بالعدوى برضو. يعني واحد عنده صبر واحتمال يقعد مع واحد يعلمه الصبر، واحد بشوش ومملوء بالسلام يقعد مع واحد يعلمه البشاشة والسلام. فـاحترس في أيام الامتحان أنك تقعد مع حد يكون يائس، يكون مضطرب، يكون متضايق يقول لك: مفيش فايدة.. مش هننفع، الوقت مش هيكفي، ساقط ساقط!! مش هجيب مجموع!! تلاقي نفسك ارتبكت. يقول لك: العلم ده ما يتفهمش، تلاقي نفسك نسيت اللي ذاكرته! اقعد مع الناس اللي يشجعوك، مش اللي ييأسوك.

كمان ما تقعدش مع الواحد اللي يربكك في أسئلة فوق مستواك، فيه طلبة مذاكرين ويتحدوا الآخرين ويسألك أسئلة تعجيز تشعر بيأس، تقول: مفيش فايدة.

أحسن حاجة ذاكر مع غيرك إذا ذاكرت، ولكن بدون الكلام اللي يؤثر على النفسية.

 ربنا يكون معاكم.

_{[1] سؤال أجاب عنه قداسة البابا شنوده في عظة بعنوان “الله القوي في عمله” بتاريخ 23 مايو 1980م}