سؤال هل امرتم حقيقة أن تقفل الكنيسة ولا تفتح قبل الساعة 3 لأن المنظمين اخرجوا كل من فيها وقفلوها؟
سؤال
هل أمرتم حقيقة أن تقفل الكنيسة ولا تفتح قبل الساعة الثالثة لأن المنظمين أخرجوا كل من فيها وقفلوها وعلقوا ورقة على الباب بهذا وشكرًا؟ [1]
الإجابة:
أنا طبعًا لا أمرت ولا حاجة هو يظهر المنظمين علشان يدوا كلامهم نوع من الرسمية قالوا لكم كلام زي كده وأحب المنظمين دول يقعدوا معايا عشان فيه شكاوة كتير بتيجي من المنظمين يعني نحن محتاجون أن ننظم المنظمين أولاً حتى لا يتعبوا الباقين وأرجو من هؤلاء المنظمين أن يترفقوا بالناس وأن يكونوا لطفاء في معاملتهم لهم وأن لا يشتدوا على أحد ولا يسيئوا إلى أحد وأرجو من الناس أيضًا أن يحفظوا النظام حفظ النظام ده في الحقيقة أحيانًا بيبقى مشكلة في منتهى الصعوبة يظهر الشعب بتاعنا عايز مدد طويلة على بال ما يتعلم النظام مدد طويلة
وساعات الناس يطلبون طلبات مش معقوله أو غير مناسبة حتى مني أنا شخصياً يعني أكون جاي لكم والوقت خلاص راح خالص وأنا اتأخرت وألاقي 200 أو 300 أو 400 واحد واقفين على الباب يسلموا طب نسلم عليهم ونأخذ بركة لكن تلاقي واحد يجي يسلم فيبتدي يحكي حكايات ويوقف طابور ويشرح أمور خاصة به مش وقته يا ابني طب بعدين
طب بس دقيقة واحدة، حاجة مش معقوله. أو واحد يروح مطلعلك كتاب علشان تمضيه له. طب ما لو قعدنا نمضي، هنفتح محطة اختياري في السكة ومش هنقدر نوصل. أو واحد يقول عاوز أقابلك. طب، بعدين. لا، اديني ميعاد دلوقتي، أنا أعرف يا بني، أنا عارف يا ابني هديك ميعاد إزاي؟ جايز اديك ميعاد ويكون مشغول. الناس ساعات يبقوا صعبين خالص في معاملتهم. يعني ناس وقت سلام خليها سلام وبس. والحاجات التانية ليها وقتها فجايز برضو المنظمين بيصطدموا بأشخاص صعبين زي أولاد صغيرين يجروا قصاد العربية ويقطعوا الطريق وسطها يبقى السواق يخاف ليدوسهم في السكة وهما قاعدين يجروا علشان يمشوا قصادها كدا ياولاد عيب مفيش فايده ويعني أريدكم أن يأتي وقت لا تحتاجون فيه إلى منظمين لو كل واحد بينظم نفسه بنفسه لا يحتاج إلى منظم
لو كل واحد بينظم نفسه بنفسه لا يحتاج إلى منظم دا ساعات نكون ماشيين في موكب وموكب يوم عيد والشمامسة صف يمين وصف شمال ما نقدرش الشعب خلاص يبقى كل الموكب راح وتلاقي واحد راح زرق راسه وسط رجلين الشمامسة وراح داخل جوا يا ابني ايه ده؟ او واحد أصر انه يكسر الصف غصب عن الموجودين أو ماشيين والمعاد خلاص والناس وواحد يقول أنا جاي من أسيوط لازم أقابلك لا مش عارف معايا حد عياني طب وده وقت حاجات يا ابني لما نوصل ما أقدرش أعدلكوا الحاجات الخاصة بالنظام دي لكن نرجوكم أن خلوا وقت الجد جد أو واحد تطلع في مخه أنه عايز يسلم فيلف لفتين تلاتة ويخش في الصف تاني ويجي ويخش تالت ويجي وقت حاجات زي ده ياريت أنه كنتوا تحفظوا النظام بنفسكم بلاش الحاجات دي.
وبعدين يضطروا كما قال بولس الرسول بولس الرسول قال لهم ألزمتموني أن أغير صوتي ألزمتموني ايه أن أغير صوتي؟ يعني اضطروني أن أشخط فيكم ألزمتموني أن أغير صوتي فليه اتنوا تخلوا المنظمين يغيروا صوتهم بالنسبة لكم؟ خليكم كدا لطفاء خليكم ايه لطفاء ونظموا نفسكم من جوا.
[1] سؤال أجاب عنه قداسة البابا شنوده في عظة بعنوان ” صوم الحواس” بتاريخ 15مارس 1974م