سؤال واحد بيقول هل المسل الصناعي الصيامي السمن؟

سؤال:

واحد بيقول: هل المَسَل، المَسَل الصناعي صيامي، – السمن الصناعي يعني – صيامي؟ ^[1]

الإجابة:

فيه نوعين من السمن الصناعي: نوع منه مجرد زيوت مجمدة مهدرجة فقط، وطبعًا ده طعام صيامي، وفيه زيوت مجمدة مضاف عليها شحوم حيوانية، يعني لازم الواحد يشوف إيه تركيب السمنة دي. فإذا كانت مجرد زيت مجمد ومهدرج، يبقى من ناحية الصيام ما زال طعام نباتي.

طب وإيه المانع تستخدم نفس الزيت يعني بدال الهدرجة دية والتجميد، ولا مسألة طعم؟ إن كانت مسألة طعم، يبقى أنت أخدت شكلية الصيام وتركت روحه، روح الصيام زي ما قال دانيال النبي “إني صُمت ثلاثة أسابيع أيام، لم آكل لحمًا ولا شيئًا شهيًا” (دا 10) يعني بَعُدت عن الأشياء التي لها شهوة في النفس.

فالصيام الحقيقي إنك تَبعُد عن شهوات الطعام، وبالتالي تَبعُد عن شهوات الخطية. لكن إذا كنت تشتهي شيئًا وتأكله، احنا هنخش في شكليات: مجرد ده زيت ولا مش زيت؟ ده حتى لو كان صيامي واشتهيته، ابعد عنه. ليه يعني تستخدم السمن الصناعي ده؟

^{[1] سؤال أجاب عنه قداسة البابا شنوده في عظة في كنيسة مار مرقس بمصر الجديدة بعنوان “الروح القدس وعمله في الإنسان”، بتاريخ 9 أبريل 1981م}