سؤال نحن الأمهات والفتيات محتاجين لكتاب به قصص للأطفال عند النوم؟

سؤال:

واحدة بتقول: نحن الأمهات والفتيات محتاجين لكتاب به قصص للأطفال عند النوم قصص مصورة ومبسطة ومشوقة وشكرًا؟ ^[1]

الإجابة:

ليكي حق، إحنا من واجبنا نعمل لكوا القصص دي، بس ما تقولوهاش كلها للعيل في ليلة واحدة وبعدين تاني يوم ما تلاقوش حكايات تقولوها، يعني واحدة واحدة كده.

فيه حكايات كتيرة برضو محتاجين لناس كويسين في الترجمة، أنا عملت عندي بنعمة ربنا مكتبة كبيرة خالص للأطفال، لكن للأسف الكتب العربية اللي فيها قليلة وغالبيتها كتب بلغات أجنبية، لأن الناس دول اهتموا بالأطفال أكتر مننا وطلعوا لهم كتب كتير أكتر مننا، فلو لقينا حد منكم يترجم اللي فيكم مستعدين للترجمة ولو يترجموا من منازلهم يعني مش هنجيبكوا في الكنيسة ولا في البطرخانة تترجموا، في بيوتكم نديكم الكتب وتترجموا تبقوا عملتوا عمل خير، وفي نهاية الاجتماع ده اللي عندهم استعداد للترجمة كل واحد أو واحدة يكتب اسمه واللغة التي يتقنها، ومدى استعداده، وعنده وقت ولا ما عندوش، وإن شاء الله نوزع عليكم كتب ونعمل حكايات للأمهات اللي عايزين يقولوا للأولاد قصص يعني.

وممكن تكون مصورة، ومبسطة، ومشوقة، إذا ما لقيتوش ولسه على بال ما يطلع الكتاب جايز ياخد وقت، عندكوا في سير القديسين وفي قصص الكتاب المقدس حاجات من النوع ده.

الأجانب في الحقيقة بيهتموا بالأطفال أكتر من اهتمامنا إحنا، يعني تلاقوا حتى الكتاب المقدس ربما فيكوا حد شاف الكتاب اللي اسمه Children’s Bible كتاب مقدس للأطفال لما يجيب قصة الخليقة مش مجرد كلام جنب بعضه زي الكلام اللي موجود أسطر جنب بعضيها كده، تلاقي كلها قصص لطيفة وحكايات صور جميلة جدًا من مجموعة من الفنانين أبدعوا في التصوير، مع براعة في الإخراج وفي الخط الكبير المقروء للأولاد، وبطريقة حلوة جدًا… فرق بين إنك تحكي للولد قصة فلك نوح، وفرق بين إن إلى جوار القصة تجيب له صورة جميلة جدًا عن فلك نوح، الصورة دي مش هينساها وهينبسط منها، فبرضو إحنا عايزين نطلع قصص الكتاب المقدس نفسها للأولاد في طريقة تساعدهم على القراءة وتشوقهم ودي فكرة كويسة.

 السؤال بتاع الأمهات دول هحتفظ بيه في جيبي علشان يعني يبقى للعلم والتنفيذ.

^{[1] سؤال أجاب عنه قداسة البابا شنوده في عظة بعنوان “التواضع” بتاريخ 5 فبراير 1981م}