سؤال بيقول كيف نظلم الشيطان؟ وما هي الخطايا اللي بدون شيطان؟

سؤال:

واحد بيعلق على موضوع، بيقول: كيف نظلم الشيطان؟ وما هي الخطايا إللي بدون شيطان؟ ^[1]

الإجابة:

 في خطايا سببها شهوة الإنسان في قلبه، مش ضروري شيطان يُغريه من الخارج، جايز شهوته في قلبه تسقطه. زي إنسان بيحب الخطية.

دا جايز الشيطان يهرب منه وهو يجري وراه، مش الشيطان إللي بُيغريه ويدور على الخطية وما يلاقيهاش يدور على الخطية وما يلاقيهاش. ويقعد يفكر يشوف له خطية ولو ولو يتفنن فن إزاي يوجِد خطية، فكتير جدًا بتكون سبب سقطة الإنسان شهوة قلبه من الداخل.

ربما بعض الشهوات يكون بدأ فيها الشيطان، لكن جايز بعض الشهوات بتكون من داخل الإنسان مش من برا، من داخل الإنسان مش من برا!

فالشيطان بيُسقط الإنسان كثيرًا، لكن ليست كل سقطة سببها الشيطان، فيه سقطات سببها شهوات القلب من الداخل، بدليل إن القلب لو كان من الداخل نضيف مهما عمل الشيطان من برا ما يقدرش عليه، الشيطان بيدور على حاجة جوا نفسك يخش منها.

والشيطان يقترح اقتراحات ولكن لا يرغم الشخص على السلوك فيها، بدليل في التجربة على الجبل اقترح اقتراحات على السيد المسيح قدم أفكاره، فكل هذه الأفكار رفضها المسيح، فالشيطان مشي في خزي لأنه لم يجد في الذي أمامه استجابة. إيه بيعمل إيه الشيطان؟ بيقدم اقتراحات… وأحيانًا الإنسان بيكون عنده خبره، مش محتاج لاقتراحات الشيطان، يقول له: لا دا أنا أفهم في الخطية دي أكتر منك عندي خبرة عملية فيها ما تزعلشي.

^{[1] سؤال أجاب عنه قداسة البابا شنوده في عظة بعنوان ” فلنبدأ بدءًا حسنًا” بتاريخ 1 يناير 1992م}