سؤال والدتنا دائمة الشجار على أقل شيء ونحن على وشك الامتحان فنرجو الإرشاد؟

سؤال:

إننا أختان وفي شجار بيننا وبين والدتنا باستمرار، على أقل شيء تلاقيها تزعل مننا وتشتم والبيت أصبح جحيم، وأنا امتحاني يوم أول مايو وأختي امتحانها ورايا على طول، ومش عارفين نذاكر خالص ولا نعمل أي شيء. فنرجو الإرشاد؟ ^[1]

الإمضاء: الأختان المعذبتان. 

الإجابة:  

لازم بيتخانقوا مع أمهم ولازم أمهم تعمل معاهم خناقات، ومش قادرين يأجلوا الخناقات لبعد الامتحانات. لو أمكوا وافقت على معاهدة إنها تحوش الخناقات لبعد الامتحانات يبقي كويس. أو لو وافقت إنها تجمع الخناقات بتاعت الأيام اللي جايه دلوقتي وتقولوا لها: اتخانقيهم كلهم دلوقتي يبقي كويس، مفيش إللي أقولكوا تعملوه الآتي:

حاولوا إنكم ما تحتكوش بيها ما تحتكوش بيها، كل واحدة تخش لوحديها وتذاكر.  

أنا خايف تجيبوا لي أمكوا أتفاهم معاها، تقولكوا إنكوا أنتوا بتشتكوني تعمل لكوا خناقة جديدة. فحاولوا إنكم ما تحتكوش بأمكم، وتقولوا لها حاضر وأيوه وطيب ومعلش، ويعني حتى لو عملت حاجة ما تزعلوش، وخلوا مشاعركم متركزة في الدروس بحيث أي حاجة تعملها أمكوا تغيظكوا ما تبقوش تنغاظوا.  

أنتوا كمان خليكوا ماتنغاظوش بسرعة، يعني لو أمكم عرفت أنها مهما غاظتكوا مش هتنغاظوا هتبتدي تنغاظ هي. أو كلموها قولوا لها: يا ماما إحنا داخلين على الامتحان، ويعني نرجو إنك

أنتِ تدينا فترة هادية. وأعتقد إنكوا ماجبتوش هدية لأمكم في عيد الأم وإلا كانت رضيت عليكوا.  

حاولوا إنكوا تبسطوها بأي طريقة. ولو كل يوم تبتدوا اليوم بكلمة لطيفة كده تقولها لها. وربنا يهدي سرّها يا بنات، مش عارف الحكاية دي مش طبيعية أبدًا. إلا لو كنتوا أنتوا بتتعبوا أمكوا وهي ليها حق وأنتوا الغلطانين إذا كان كده شوفوا إيه بتعملوه علشان تغيظوا بيه أمكوا وابعدوا عنه.  

أنا خايف في الاجتماع كل واحدة تشوف مين ليها بنتين بيحضروا كتير خالص مفيش واحدة تفتكر الكلام ده عليها. دا عندنا أمثلة مئات الأمهات كل واحدة ليها بنتين، كتير خالص أحسن تفتكروا عليكوا الكلام دا وتزعلوا البنات في البيت. والستات يشوفوا مين من بناتهم هتمتحن أول مايو يا ريتني ما قلت التاريخ، معلش. 

إحنا يا بنات داخلين على أسبوع آلام، وفي أسبوع الآلام تحاولوا إنكوا أنتوا تنسوا آلام البيت وتفتكروا في آلام المسيح.

ونصيحتي أيضًا إنكوا تصطلحوا مع أمكوا صلح يشمل الكل.

^{[1] سؤال أجاب عنه قداسة البابا شنوده في عظة بعنوان “الهدف في الحياة الروحية” بتاريخ 9 أبريل 1976م}