سؤال واحد بيقول ما معنى إن قايين قال كل مَن وجدني يقتلني هل يوجد ناس تانيين غير آدم وحواء؟

السؤال:

واحد بيقول: ما معنى إن قايين قال: “كُلُّ مَنْ وَجَدَنِي يَقْتُلُنِي” (تك4: 14)، هل يوجد ناس تانيين غير آدم وحواء؟ ^[1]

الإجابة:

ما هو طبعًا كان فيه قرايبهُم يعني، وفيه إخوته، بنات وولاد، وفيه آدم وحواء. يعني ممكن يخاف إن أبوه يمَوِّتُه زي ما هو مَوِّت أخوه، يخاف إن أُمه تمَوِّتُه، لأنه هو قتل ابنها، يخاف إن مرات هابيل، يخاف إن إخوته البنات، يخاف أي حد.

كمان الشخص دايمًا القاتل، الخوف يُطارِدُه، حتى لو ما فيش حد قصاده. زي ما بيقول الكتاب: “يخاف ولا مُطَارِد”، يعني يبقى خايف، ويفتكر إن فيه حاجات عايزه تقضي عليه، وما فيش حاجة. ولذلك من الأمراض النفسية التي أُصيب بها قايين: الرُعب، والخوف، والهَلَع، وعاش كدة تعبان.

الخائف والقاتل، ما بيفَكَرش بالتفكير المَنطقي اللي أنت بتقولُه، مين مين من الأشخاص يقتله! هو يشعر إن القتل وراه؛ فتَقوده عوامل نفسية، وليس عوامل عقلية. وحتى من ناحية العقل، يفتِكِر إن كل قرايبُه، إذا كان الأخ قتل أخوه؛ ممكن الابن يقتل ابنه، ممكن، ممكن الأم، ممكن القرايب، ممكن اللي يتولدوا بعد كدة.

ياما بيحصل حاجات زي دي في الانتقام والثأر. واحد يكون أبوه سابُه وهو طفل، يقولوا له: أبوك اتقَتَل، تجرى ورا ثأر أبوك وهو لسه عيل صغير، لما يكبر.

^{[1] سؤال أجاب عنه قداسة البابا شنوده في عظة بعنوان “المعرفة الضارة” بتاريخ 20 مايو 1992م}