سؤال واحد بيقول كنت في الخطية وقررت إني أتوب ولكن تُوجد شهوة معطلة توبتي فماذا أفعل لكي أتوب؟

سؤال:

واحد بيقول: كنت في الخطية وقررت إني أتوب ولكن تُوجد شهوة معطلة توبتي، فماذا أفعل لكي أتوب؟ ^[1]

الإجابة:

التوبة معناها نقطة الضعف بالذات اللي عندك هي اللي تسيبها، فلو عملت كل حاجة ما عدا نقطة الضعف ديه يبقى ما عملتش حاجة، لأن جايز الشيطان لا يحاربك في كل الخطايا لكن بيحاربك في خطية واحدة أو اتنين ويكتفي بيهم، فأنت في المكان الذي يحاربك فيه الشيطان لا بد أن تنتصر.

يعني الشاب الغني مثلًا كان بيحفظ كل الوصايا لكن كان فيه نقطة ضعف واحدة هي محبة المال، الكتاب ما قالش إن عنده حاجات كتيرة، النقطة الضعف الوحيدة ديه هي اللي ضيعته فمضى حزينًا، فأنا عايزك الشهوة اللي مُنتصرة عليك دي أنت تنتصر عليها، وتقول: ما دام هي الشهوة دي هي اللي بتبعدني عن ربنا مفروض إن أنا لا أترك شيء يبعدني عن ربنا مهما كان، فما تفتكرش إن ربنا بياخد بالغالبية يعني يكون عندك مثلًا 20 وصية تكون ماشي في 17 وواقع في 3 وتقول: الحسنات يُذهبن السيئات! لأ، سيئة واحدة ممكن تضيّعك، زي ما نقول ثوب نضيف بقعة واحدة ممكن تخليه مش نضيف، فحاول إنك أنت تنتصر.

^{[1] سؤال أجاب عنه قداسة البابا شنوده في عظة بعنوان ” الوسائط الروحية – شروط الخدمة الناجحة” بتاريخ 1 يوليو 1992م}