سؤال واحدة بتقول زوجي له 40 سنة لم يتناول من الأسرار المقدسة؟

سؤال:

واحدة بتقول: زوجي ليه 40 سنة لم يتناول من الأسرار المقدسة، -40 سنة –، مع إني خادمة في إحدى الكنائس، وأحيانًا يمنعني من الخدمة، وقد زارنا أب اعترافي عدة مرات، ولكن لم يؤثر عليه؟ ^[1]

الإجابة:

ما تيأسيش منه برضو، وخلّي آباء آخرين يفوتوا عليكوا في البيت، ربما إن ما اتأثَّرش من واحد يتأثر من تاني. وبرضو إن كانت المسألة عايزه إنه يعترف قبل التناول أو شاعر إنه غير مستحق، يا ريت تجيبي له أب من الآباء الكهنة الكبار أوي في السن، ما دام هو بقى له 40 سنة ما اتناولشي، يبقى عمره ما يقلِّش عن 60 يعني مثلًا، يكون اتجَوَّزِك وهو عمره 20 ولا حاجة، على الأقل يعني، فربما يكون أكتر من 60. فلما يكون واحد كبير أكتر من 60، ربما يحتاج لأب اعتراف كبير في السن علشان يطمئن إليه، يقول: برضو ده، وفي آباء عندنا شيوخ كبار يُقعُد معاه، يفهموا بعض دول يعني من دور بعض، جايز تجيب له نتيجة دي، وما تيأسيش برضو.

^{[1] سؤال أجاب عنه قداسة البابا شنوده في عظة في كنيسة مار مرقس بمصر الجديدة، بعنوان “الروح القدس وعمله في الإنسان”، بتاريخ 9 أبريل 1981م}