سؤال هل شرب الخمر بكمية قليلة ليس صحيح أو غير مرغوب فيه؟

السؤال:

واحد بيقول: هل شرب الخمر بكمية قليلة ليس صحيح (يقصد ليس شرعي يعني) أو غير مرغوب فيه؟ ^[1]

الإجابة:

هو في الحقيقة الكمية القليلة تجيب الكمية الكبيرة بالوقت، يعني كل واحد بيشرب خمر دلوقتي بطريقة ما بيقدرش يبطلها، ابتدى بحاجة قليلة.

وما تفتكروش الشيطان لما يحاربكم، يحاربكم بحاجة كبيرة في الأول؛ يحارب بحاجة صغيرة صغيرة لغاية لما يسيطر.

طبعًا عند إخوتنا المسلمين ما فيش شرب خمر خالص. غالبًا اللي بيسأل السؤال ده مسيحي. أه، يعني لو كان مسلم كان سأله لفضيلة المفتي.

المسيحية لا تحرّم المادة، لكن تحرّم الاستخدام السيء للمادة، وتحرّم أيضًا سيطرة المادة على الإنسان. في آية في الإنجيل بتقول: “كُلُّ الأَشْيَاءِ تَحِلُّ لِي، ولَكِنْ لاَ يَتَسَلَّطُ عَلَيَّ (منها) شَيْءٌ” (1كو6: 12) يعني إذا وجدت شيء يتسلط عليك ويفقدك إرادتك وتبقى مستعبد ليه، يبقى غلط، حتى لو كان فنجان قهوة أو فنجان شاي. لأن في إنسان ما يقدرش يبتدي اليوم إلا لما ياخد فنجان قهوة، يبقى معناها لو جاء له صوم رمضان، يبقى الله يعوض علينا فيه، مش كده؟

فأنت ما تخليش حاجة تسيطر عليك إطلاقًا، يعني لا تخضع نفسك لعادة من العادات بحيث تفقد حريتك الشخصية أمام هذه العادة.

^{[1] سؤال أجاب عنه قداسة البابا شنوده في محاضرة بعنوان: “الأخوة الدينية والوحدة الوطنية – محاضرة في الجامعة الأمريكية” بتاريخ 26 أبريل 1995م.}