سؤال ما الحل في الأفكار الشريرة التي أفكر فيها؟

سؤال:

واحد بيقول ما الحل في الأفكار الشريرة التي أفكر فيها؟ ^[1]

الإجابة:

 في كتاب سنوات مع أسئلة الناس أنا كاتب حاجات عن الأفكار الشريرة، وأعتقد في الحروب الروحية كاتب باب عن الأفكار…

لكن نصيحتي ليك إذا جاء لك فكر شرير لا تستعمله يعني ما تفتحش ذهنك ليه ما تستمرش فيه حاول أنك أنت تتخلص منه.

من ضمن طرق التخلص أنك تستبدل فكر بفكر، يعني تفكر في حاجة تاني غير الفكر ده، ويا ريت الحاجة التانية يكون فكر قوي يطرد الفكر الأولاني، لأن الأفكار الخفيفة السطحية ما بتقدرش تطرد الفكر، يكون فكر عايز مناقشة بتاع مشكلة، بتاع عقيدة، بتاع أي حاجة، فكر جامد كدا.

وأيضًا القراءة تصلح أفكارك لأن الذي تقرأه ممكن تفكر فيه بس تكون قراءة مؤثرة.

كمان ابعد عن مصادر الفكر الشرير، إذا كان الفكر جاي من مناظر، جاي من قراءات، جاي من صداقات، جاي من خطايا، تحاول تبتعد عن أسباب الفكر وربنا ينجيك.

واقرأ الكلام إللي إحنا كتبناه في كتاب سنوات مع أسئلة الناس.

^{[1] سؤال أجاب عنه قداسة البابا شنوده الثالث، في عظة بعنوان “حتى المسيح كان له مقاومون”، بتاريخ 8 أبريل 1992م.}