سؤال كيف لي أن أطبق آيات الكتاب على حياتي على الرغم إني أجد أن تطبيقها يستلزم إني أترهبن؟

سؤال: (كتاب مقدس)

كيف لي أن أطبق آيات الكتاب على حياتي، على الرغم إني أجد أن تطبيقها يستلزم إني أترهبن؟ إيه الآيات دي؟ ^[1]

مثل «اذْهَبْ بِعْ كُلَّ مَا لَكَ وَأَعْطِهِ لِلْفُقَرَاءِ وَتَعَالَ اتْبَعْنِي» (مت 19: 21)، يقولك أنفذها إزاي؟ دي عايزه رهبنة…

2) «إِنْ كَانَ أَحَدٌ لَا يُبْغِضُ أَبَاهُ وَأُمَّهُ وَإِخْوَتَهُ وَأَخَوَاتِهِ حَتَّى نَفْسَهُ أَيْضًا، لَا يَقْدِرُ أَنْ يَكُونَ لِي تِلْمِيذًا» (لو 14: 26)، بيقول دي الأخرى عايزه رهبنة.

3) «صَلُّوا كُلَّ حِينٍ وَلَا تَمَلُّوا» (لو 18: 1)، عايزه رهبنة.

4) «لَا تُحِبُّوا الْعَالَمَ وَلَا الْأَشْيَاءَ الَّتِي فِي الْعَالَمِ» (1 يو2: 15)، عايزه رهبنة.

5) «اِسْهَرُوا وَصَلُّوا لِأَنَّكُمْ لَا تَعْرِفُونَ الْوَقْتَ» (مر13: 33)، بيقول عايزه رهبنة.

6) وآيات البتولية الكثيرة التي ذكرها بولس الرسول، بيقول عايزه رهبنة.

7) حياة إيليا النبي ويوحنا المعمدان وبولس ويوحنا الرسولان، كذلك حياة معظم القديسين الذين تركوا العالم من أجل العيش مع الحبيب.

الإجابة:

لأ، شوف يا حبيبي، في حاجات من دي تقدر تتركها، يعني من أمور العالم، وآيات ممكن تنفذها من غير ما تترهبن. طبعًا الرهبنة بتبقى كمال الحياة الروحية، مفيش شك، لكن في حاجات ممكن. يعني الآية بتاعت «لَا تُحِبُّوا الْعَالَمَ وَلَا الْأَشْيَاءَ الَّتِي فِي الْعَالَمِ» (1يو2: 15)، ممكن وأنت موجود في العالم تنفذها. وطبعًا الآية دي مقصود بيها أهل الدنيا أيضًا، مش بس أهل الأديرة والبراري. ولما الرسول قال: «لَا تُحِبُّوا الْعَالَمَ وَلَا الْأَشْيَاءَ الَّتِي فِي الْعَالَمِ»، ما كانش في رهبنة ساعتها، بل كل هذه الآيات عندما قيلت ما كانش في رهبنة. دي الرهبنة ظهرت في القرن التالت وازدادت في القرن الرابع، وقبل كده ما كانش في رهبنة. لكن طبعًا كان في توحد، زي يوحنا المعمدان ما كان متوحد في البرية، وزي إيليا النبي وأليشع النبي كانوا متوحدين في جبل الكرمل أو غيره، فكان فيه توحد، لكن مفيش رهبنة بالمعنى الحالي.

الآية بتاعت «لَا تُحِبُّوا الْعَالَمَ وَلَا الْأَشْيَاءَ الَّتِي فِي الْعَالَمِ» مفروض كل إنسان ينفذها، مش بس الرهبان، بدليل إن الكنيسة من اهتمامها بهذه الآية بالذات بتخليها تتقال في قراءات الرسايل في كل يوم في القداس: «لَا تُحِبُّوا الْعَالَمَ وَلَا الْأَشْيَاءَ الَّتِي فِي الْعَالَمِ، لِأَنَّ الْعَالَمَ يَبِيدُ وَشَهْوَتَهُ مَعَهُ» (1يو2: 15-17). وممكن إنك أنت لا تحب العالم وأنت قاعد في العالم، يعني تسكن في العالم ولا يسكن العالم فيك، وكما قال بولس الرسول: «إن يكون الَّذِينَ يَسْتَعْمِلُونَ هَذَا الْعَالَمَ كَأَنَّهُمْ لَا يَسْتَعْمِلُونَهُ» (1 كو7: 31).

الآية بتاعت «اذْهَبْ بِعْ كُلَّ مَا لَكَ» (مت19: 21) لم يقلها السيد المسيح للشاب الغني لكي يترهبن، واستطاع المسيحيون أن ينفذوها في العصر الرسولي الأول، فكل الذين كان عندهم أموال كانوا بيبيعوها ويضعوها تحت أقدام الرسل، ونُفذت فعلًا «وَكَانَ كُلُّ شَيْءٍ بَيْنَهُمْ مُشْتَرَكًا» (أع 2: 44). وأنت ممكن تبيع كل ما لك وأنت قاعد في العالم، ده بالعكس، الراهب يمكن الآية دي ما يعرفش ينفذها، لأنه نفذها مرة واحدة بس يوم ما ابتدا، وبعد كده ما عندوش حاجة، لكن أنت كل يوم والتاني بيجي لك أموال جديدة تستطيع إنك تبيعها من أجل ربنا. ده أحد القديسين الذين عاشوا في العالم باع كل شيء وأعطاه لربنا، ولما لم يجد شيئًا يبيعه، باع نفسه كعبد وخد تمن نفسه وأداه للفقرا، زمان أيام ما كان في رقّ.

على الأقل إنك أنت ما تحبش المال، وما تحبش العالم، ويبقى تركت العالم في قلبك وتركت المال في قلبك. وفيه أشخاص كانوا أصحاب أموال وكانوا قديسين، زي إبراهيم أب الآباء، وزي أيوب الصديق، وزي يوسف الرامي، كانوا ناس أغنيا، كانوا يملكون المال ولم يكن المال يملكهم، كانوا يملكون المال ولم يكن المال يملكهم، وكانوا يستعملون المال ولم يكن المال يستعملهم، كان المال في خدمتهم ولم يكونوا في خدمة المال. ولما المسيح اتكلم على الآية «اذْهَبْ بِعْ كُلَّ مَا لَكَ»، وكلم الرسل وقالوا له: يبقى لا يخلص أحد، قال لهم المقصود هو المتكلين على أموالهم، الناس اللي بيعبدوا المال، بيعبدوا المال، زي ما قال: لا يمكن أن تعبد ربين، واللي بيتكلوا على المال.

«صَلُّوا كُلَّ حِينٍ وَلَا تَمَلُّوا» (لو18: 1). ممكن إنك أنت تصلي وأنت بتشتغل، وتصلي وأنت ماشي، وتصلي وأنت قاعد وسط الناس، وتصلي لما تيجي ترقد: «كُنْتُ أَذْكُرُكَ عَلَى فِرَاشِي» (مز63: 6)، وتصلي في كل حين، يعني مش كل دقيقة تصلي فيها، يعني كل وقت يصلح للصلاة. كل وقت يصلح للصلاة.

على أي الحالات، اللي أقدر أقوله لك: ابتدي في كل وصية من دول، ولو تخطو أول خطوة، وبلاش تقول إن أنا أصل إلى كمال الوصية وإلى آخرها، وإذا قدرت تستمر لغاية لما تكمل وتروح الرهبنة، كويس، ما قدرتش، يبقى اللي قدرت عليه على قدك كفاية، المهم إن يكون عندك النية دي. أما الآية بتاعت «إِنْ كَانَ أَحَدٌ لَا يُبْغِضُ أَبَاهُ وَأُمَّهُ وَإِخْوَتَهُ حَتَّى نَفْسَهُ» (لو14: 26)، المقصود بيها إن ما يحبش حد أكتر من ربنا، ولو اصطدمت أي محبة بربنا، يضحي بيها من أجل الله، ودي ممكن أيضًا إنك تعملها في العالم وسهلة جدًا.

«اِسْهَرُوا وَصَلُّوا لِأَنَّكُمْ لَا تَعْرِفُونَ الْوَقْتَ». معناها الاستعداد للموت، ودي ممكن أيضًا في العالم، إنك أنت تكون مستعد للموت. ومن جهة السهر والصلاة، بتسهر وتصلي على قد ما تقدر.

يعني خلاصة الكلام إنك نفذ هذه الوصايا في حدود إمكانياتك وقدرتك، على قد ما تقدر، على قد ما تقدر، نفذ في حدود إمكانياتك، في حدود قدرتك، والله يريد منك القلب والنية الطيبة. فإذا مشيت في طريق الوصية حتى لو لم تدرك كمالها، المهم إنك أنت ماشي، زي ما بيقول في المزمور: «طُوبَاهُمْ الَّذِينَ بِلَا عَيْبٍ، السَّالِكُونَ فِي الطَّرِيقِ» (مز119: 1)، اللي ماشين في السكة. «طُوبَاهُمْ الَّذِينَ بِلَا عَيْبٍ، السَّالِكُونَ فِي الطَّرِيقِ»، اللي ماشين في السكة. وبولس الرسول اللي قال بعض من الآيات دي، ما هو الآخر كان في العالم، أُمال هو كان فين؟ كان راهب؟ ما كانش راهب. ويوحنا الحبيب اللي قال بعضها، ما كان في العالم، ما كانش راهب. والمسيح اللي قال بعضها كان عايش معانا في العالم برضو وبيجول في المدن والقرى.

أما الآيات الخاصة بالبتولية، فممكن إنسان يكون بتول وفي العالم، مش ضروري بتول وبيترهبن، وفي ناس بتوليين وفي العالم، وفي ناس متزوجين ولهم عفة البتوليين.

^{[1] سؤال أجاب عنه قداسة البابا شنوده في عظة بعنوان “تأملات في حياة موسى النبي – وردة وسط الأشواك”، 17 سبتمبر 1976م}