سؤال بيقول ما معنى إن الكلمة صار جسدًا في يوحنا 1 إزاي صار جسدًا؟

سؤال:

 واحد بيسأل بيقول: ما معنى إن “الْكَلِمَةُ صَارَ جَسَدًا” في (يوحنا1: 14) إزاي صار جسدًا؟ ^[1]

الإجابة:

لتفسير الحكاية دي عايز أقولكوا إن لازم نعرف إيه لغة الكتاب المقدس وأسلوب الكتاب المقدس. في الكتاب المقدس أحيانًا كلمة جسد تدل على الإنسان كله، كل الإنسان. يعني ربنا لما جه يتكلم على أواخر الأيام في (متى ٢٤) قال: “وَلَوْ لَمْ تُقَصَّرْ تِلْكَ الأَيَّامُ لَمْ يَخْلُصْ جَسَدٌ” (مت 24: 22). كلمة “لم يخلص جسد” يعني لم يخلص أحد مش بس جسد من غير نفس يعني لم يخلص أي إنسان بس أُطلق على الإنسان كلمة إيه؟ جسد.

ولما ربنا اتكلم على الزواج في (متى 19 ومرقس 10) قال: “إِذًا لَيْسَا بَعْدُ اثْنَيْنِ بَلْ جَسَدٌ وَاحِدٌ” (مت 19: 6). يكونان ليس بعد اثنين بل إيه؟ جسد واحد. يعني إنسان واحد. مش جسد واحد يعني مجرد جسد، كلمة جسد بتعبر على الإنسان كله.

وبولس الرسول فيما يتكلم عن التبرير في الرسالة إلى غلاطية قال: “لأَنَّهُ بِأَعْمَالِ النَّامُوسِ لاَ يَتَبَرَّرُ جَسَدٌ مَا” (غلا 2: 16). مش الجسد اللي بيتبرر يعني لا يتبرر الإنسان كله. فكلمة جسد اللي هي “Flesh” بيطلق عليها معنى يعني بتؤدي إلى معنى الإنسان كله أحيانًا، فكلمة و”الْكَلِمَةُ صَارَ جَسَدًا” يعني صار إنسانًا. صار إنسانًا.

في (تيموثاوس الأولى 3: 16) بيقول: “عَظِيمٌ هُوَ سِرُّ التَّقْوَى: اللهُ ظَهَرَ فِي الْجَسَدِ” وطبعًا ظهر في الجسد مش جسد فقط؛ يعني في الناسوت كله.

^{[1] سؤال أجاب عنه قداسة البابا شنوده في عظة بعنوان “كيف نعرف الله ج2” بتاريخ 29 يناير 1992م}