سؤال يقال إنه سوف ينزل المسيح الدجال ليضل كثيرين هل هذا صحيح أم لأ ولو صحيح ما هي مواصفاته؟

سؤال:

واحد بيقول: يقال إنه سوف ينزل للمسيح الدجال ليضلّ كثيرين (قبل السؤال طيب) هل هذا صحيح أم لأ؟ وإن كان صحيح ما هي صفاته وخصائصه وهل يكون إنسان بشري أو يكون مثلًا مثل التقدم العلمي الذي تاه كثيرون وراءه؟ ^[1]

الإجابة:

 أولًا كلمة (ينزل) دي مش صح، ينزل يعني هو فوق وبينزل! ده ينزل دي بنقولها على اللي في السماء ونزل للأرض لكن ده ما دام رَجل دجال يبقى هينزل إزاي؟ يعني هيتولد يعنيـ ينزل من بطن أمه لكن يعني مش ينزل من السماء ولا من فوق يعني؟

وكلمة الدجال ما عندناش في المسيحية ما فيش حاجة اسمها المسيح الدجال، فيه حاجة اسمها Antichrist يعني ضد المسيح. وما ذُكر عن هذا الإنسان الذي يأتي في أواخر الزمان قيل إنه إنسان الخطية يعني هو إنسان زي باقية البشر سميَ “إنسان الخطية”، وقيل عنه إن هو “الْمُرْتَفِعُ عَلَى كُلِّ مَا يُدْعَى إِلَهًا، حَتَّى إِنَّهُ يَجْلِسُ فِي هَيْكَلِ اللهِ كَإِلَهٍ” (2تس2: 4)، يعني إنسان هيدعي الألوهية ويجلس في هيكل الله كإله، وإنه مقاوم، وإنه هيصنع آيات ومعجزات بقوة الشيطان وبكل خديعة الإثم في الهالكين، وهيضل ناس ويحدث ارتداد بسببه كل ده موجود في (تسالونيكي التانية أصحاح 2) (تسالونيكي التانية أصحاح 2) اقراه تلاقي كل الكلام ده.

^{[1] سؤال أجاب عنه قداسة البابا شنوده في عظة بعنوان “تأملات في الثلاث تقديسات قدوس الله قدوس القوي” بتاريخ 23 ديسمبر 1992م}