سؤال سمعت من أحد الآباء الكهنة إن الصوم يعني الامتناع عن أكل ما نُحبُّه فهل هذا ينطَبِق على كل الأيام؟

سؤال:

سمعت من أحد الآباء الكهنة إن الصوم يعني الامتناع عن أكل ما نُحبُّه، فهل هذا ينطبق على أيام الصوم فقط أم في الأيام كلها؟ وهل كوني أمتنع عن أكل كل شيء حيواني لا يُعتبر صوم، وإن الصوم هو الانقطاع التام عن الأكل فترة من الزمن؟ ^[1]

الإجابة:

الصوم في معناه الكَنَسي هو انقطاع عن الطعام فترة معينة من الزمن يعقُبها أكل خالي من الدسم الحيواني، ده المعنى الرسمي.

المعنى الروحي، إن الإنسان يمتنع عما يُحِبُّه من الأطعمة تمهيدًا لأنه يمتنع عما يُحِبُّه من الخطايا، أو من النقائص. لكن مش معنى كده إن يمتنع عن كل ما يُحِبُّه، يعني ما ياكلش غير اللي ما يحبُّوش ويبقى مش هياكل. يعني إذا أكل حاجة بتحبُّه، ما تاكلش منه كتير، كُل برضو، بس ما تاكلش كل حاجة. أنت بلاش تطلب صنف معين، لأنك لما بتطلب، إذًا بتشتهي شيء، وبتطلب الشيء ده يتنفَّذ. اللي يعملوه يعملوه، طِلِع كويس، نشكر ربنا، طِلِع مش كويس، نشكر ربنا، أهو الحاضر يسد، مش يسدّ النفس، لأ يعني، يعني، ينفع، يُستُر يعني.

وبعدين لو طِلِع من الأطعمة اللي بتحبها، زي ما بيقولوا القديسين: ارفع يدك عنه ونفسك ما تزال تشتهيه. يعني أنت بتحبُّه، بدال ما تاكل الطبق كله، كُل نُص وسيب النُص. ولو ما قدرتش وكَلْتُه كله، ما تطلبش غيره من نفس الصنف اللي بتحبُّه، يعني المهم عامل ضبط النفس يكون موجود، عامل ضبط النفس يكون موجود، هو ده اللي إحنا عايزينه.

لكن مش معناها يُشتَرَط إنك تأكل ما لا تُحِبُّه، جايز ما يجيلَكش نِفس؛ ما تاكلش خالص، المهم في ضبط النفس.

^{[1] سؤال أجاب عنه قداسة البابا شنوده في عظة بعنوان “المتضع بعيد عن الغضب” بكنيسة مار مرقس بمصر الجديدة بتاريخ 5 مارس 1981م}