سؤال بيقول هل يجوز قراءة الإنجيل بالمنزل ويكون الإنسان جالس حيث يكون متعبًا وكذلك قراءة الأجبية في الأتوبيس أو العمل؟

سؤال:

واحد بيقول: هل يجوز قراءة الإنجيل بالمنزل ويكون الإنسان جالس حيث يكون متعبًا وكذلك قراءة الأجبية في الأتوبيس أو العمل؟ ^[1]

الإجابة:

ممكن تقرأ الإنجيل في البيت وأنت قاعد، بس تكون قاعد بخشوع وباحترام وبوقار؛ لكن مش قاعد وقصادك كوباية شاي، أو قاعد ومسترخي لأ، يعني تكون قاعد باحترام، بخشوع يليق بالكتاب المقدس، لأن إحنا إن كنا بنقول في الكنيسة: (قفوا بخوف من الله، وانصتوا لسماع الإنجيل المقدس)، فإن كنت مش قادر تقف بخوف من الله على الأقل تقعد في خشوع، وفي احترام يليق بكلام الله.

ومن جهة الأجبية والصلاة ممكن تصلي زي ما أنت عايز في الأتوبيس، في الشارع في كله، لكن تكون حافظ وتصلي في سرك، مش تكون ماسك أجبية وقاعد تصلي بيه وتلفت إليك الأنظار! دي مش كويسة، تكون حافظ وتصلي في سرك من غير ما حد يحس بيك ومن غير ما تقعد وتحرك شفايفك، لأن تحريك شفايفك كده في صمت هيلفت الناس إليك ويقولوا لازم في حاجة، وما نعرفش هيفكروا الحاجة دي تطلع إيه؟ فأنت صلي في هدوء، في صمت بدون ما حد يحس بيك.

^{[1] سؤال أجاب عنه قداسة البابا شنوده في عظة بعنوان “مخافة الله ومحبته” بتاريخ 3 يونيو 1992م}