سؤال بيقول السيد المسيح بيقول من لطمك على خدك حول له الآخر فإزاي السيد المسيح أثناء محاكمته قال لماذا تلطمني؟

سؤال:

واحد بيقول: السيد المسيح قال: “… مَنْ لَطَمَكَ عَلَى خَدِّكَ الأَيْمَنِ فَحَوِّلْ لَهُ الآخَرَ أَيْضًا” (مت5: 39)، فإزاي قبل صلب السيد المسيح (يقصد أثناء محاكمته) عبد رئيس الكهنة لطم السيد المسيح فرد عليه وقال له: “إِنْ كُنْتُ قَدْ تَكَلَّمْتُ (فعلت) رَدِيًّا فَاشْهَدْ عَلَى الرَّدِيِّ، وَإِنْ حَسَنًا فَلِمَاذَا تَضْرِبُنِي (تلطمني)؟” (يو18: 23)؟  ^[1]

الإجابة:

السيد المسيح دايمًا لما يقول وصية ينفذها، وفعلًا السيد المسيح ياما ناس لطموه وقبلها في هدوء وفي صمت وحول الخدّ الآخر، والخدّ التالت، والعاشر والعشرين. ولذلك قيل في الإنجيل: “وكانوا يلطمونه قائلين: تنبأ من لطمك”، “وكانوا يلطمونه قائلين: إيه؟ تنبأ من لطمك؟”، فتركهم يلطموا زي ما هم عايزين. وأيضًا بنقول في القداس الغريغوري: لم ترد وجهك عن خزي البصاق، وفي إشعياء النبي بيقول: “بَذَلْتُ ظَهْرِي لِلضَّارِبِينَ، وَخَدَّيَّ لِلنَّاتِفِينَ” (إش50: 6) يعني هو ترك اللي بيلطمه يلطمه، لكن عبد رئيس الكهنة دا حَشر نفسه في موضوع مالوش فيه يعني دول بيحسدوا المسيح فاكرينه بياخد منصبهم غيره، ودا دخل في موضوع ما يفهمش فيه خالص، فالسيد المسيح قال له: أنت قاعد تقلد الناس على إيه؟ إن كنت تعرف عني ردي أشهد على الردي، وإن ما كنتش تعرف لماذا تلطمني؟ تودي روحك جهنم ليه، بدون ما يكون ليك دخل في الموضوع كله؟

طب افرض رئيس الكهنة نفسه بيغير مني أنت نفسك مشكلتك إيه؟ فيعني السيد المسيح فيما حول الخد الآخر لكل الناس، قدم النصيحة في السكة لواحد، لكن مع ذلك قبل منه اللطمة برضو.

^{[1] سؤال أجاب عنه قداسة البابا شنوده في عظة بعنوان “الثمر في روحياتنا” بتاريخ 4 نوفمبر 1992م}