سؤال إني أقرأ العهد الجديد فقط وأجد العهد القديم صعب؟

سؤال:

إني أقرأ الإنجيل العهد الجديد فقط، وكل ما ينتهي أرجع أقراه مرة أخرى. أما العهد القديم، فكل ما أنوي إن أنا أقرأه، أخد أصحاح أجده صعب وروح سايبه، وأسماء صعبة، هل مطلوب إن إحنا نحفظها؟ ^[1]

الإجابة:

مش كله صعب يا أخي، ليه أنت بس الحكاية الكبيرة معاك كده؟ يعني مثلًا لو قريت سفر الأمثال، سفر جميل جدًا وكله حِكَم، مش لاقي فيه حاجة صعبة. ولو قريت سفر الجامعة، في منتهى الجمال وحِكَم، وما فيهوش حاجة صعبة. لو قريت سفر إشعياء النبي، وكله كلام عن التوبة وحاجة لطيفة. لو قريت قصة داود النبي في سفر صموئيل الأول وصموئيل التاني. وقريت قصة مثلًا إيليا النبي في ملوك الأول، يعني في إيه صعب ده؟

في بعض حاجات صعبة سيبها، هقول لك زي إيه: زي مثلًا فيه بعض أصحاحات من سفر الخروج، مقاسات وأطوال وأوصاف لخيمة الاجتماع، مش مستفيد منها، سيبها، لكن في حاجات تاني في سفر الخروج كويسة خالص. فيه في سفر العدد أسماء أسباط، والسبط الفلاني… إلى آخره، بلاش دي في أخبار الأيام، لكن الباقي كويس، والحاجات دي برضو كويسة، بس لما ييجي ميعادها.

^{[1] سؤال أجاب عنه قداسة البابا شنوده في عظة بعنوان “الخلاف بيننا وبين البروتستانت في الصوم”، لإعداد الخدام بكنيسة مار مرقس بمصر الجديدة، بتاريخ 3 أبريل 1981م}