أسئلة اللاهوت الروحي

ما رأيك اكتفي بالصلاة الربانية قبل النوم وأكسل أصلي بالأجبية؟

سؤال:

 واحد بيقول عادة عندي عند النوم إني أكسِل أصلي بالأجبية وأكتفي بالصلاة الربانية. وأُعلل ذلك بإني لا أُريد أن أقرأ بالأجبية في سرعة؟ ^[1]

الإجابة:

 إن شاء الله في فترة الصيام تبطَل العادة دي، هتفضَل في الصيام بردو بتاع نوم؟

ممنوع النوم في الصوم، النوم الصلاة يعني.

إن كنت بتكسِل تصلي بالأجبية وقت النوم، صلي بالأجبية قبل ميعاد النوم بشوية. يعني إحنا كنا ساعات في الأديرة علشان ننفذ نظام الصلاة بتاعنا، نصلي صلاة الغروب والنوم بدري خالص يعني ساعة الغروب يمكِن. ونيجي قبل النوم نصلي صلاة نصف الليل علشان لو الواحد نام وساعات كُنا بننام في نُص الليل بردو، يعني الحكاية كانت تِمشي، قبل جرس الصلاة في نص الليل.

فصلي صلواتك قبل مواعيدها وقاوم النوم، قاوم النوم، وأتحايل على نفسك. يعني بعد ما تقول أبانا الذي، قول طب أقول تحليل النوم، أقول إيه؟ تحليل النوم. فلما تُقف تقول: “هوذا أنا عتيد أن أقف أمام الديان العادل مرعوب ومُرتعب من أجل كثرة ذنوبي”، تلاقي نفسك صحيت على طول كده. وبعدين بعد ما تخلَص التحاليل، قول وأقول كمان الإنجيل، طب وأقول التحليل الأخير. في الأول تقول القطع، وتُقعد طب أقول كمان مزمور، طب قربنا، طب صلاة الشكر وخلاص وهنام، طب أقول معاها المزمور الخمسين وماقولش حاجة تاني. وبعدين تقول حاجة تاني يعني ربنا مش هيزعَل مِنك، لازم الواحد يحايل نَفسه.

بيقول فهل يُمكن لي أن أصلي الأجبية بسُرعة أم أكتفي بالصلاة الربانية؟

لأ، صلي بهدوء وواحدة واحدة. واضغط على نفسك شوية، وإيه؟ واضغط على نفسك شوية، ماتدلَعش روحك.

 

^{[1] سؤال أجاب عنه قداسة البابا شنوده في عظة بعنوان “روحياتنا في الصوم الكبير” بتاريخ 21 فبراير 1990م}