سؤال واحد بيقول عند القيامة هل المسيح هيحاسب العذراء أمه؟

سؤال:

واحد بيقول: عند القيامة، هل المسيح هيحاسب العذراء أمه؟ ^[1]

الإجابة:

الكتاب بيقول في (رومية 8: 1): «إِذًا لَا شَيْءَ مِنَ الدَّيْنُونَةِ الْآنَ عَلَى الَّذِينَ هُمْ فِي الْمَسِيحِ يَسُوعَ، السَّالِكِينَ لَيْسَ حَسَبَ الْجَسَدِ بَلْ حَسَبَ الرُّوحِ» (رو 8: 1) فالعذراء التي في المسيح يسوع، والمسيح يسوع فيها، السالكة بحسب الروح، لا دينونة عليها في اليوم الأخير هتتحاسب على إيه؟ دي في اليوم الأخير هتكون العذراء هي الملكة القائمة عن يمين الملك. مش واقفة تتحاسب، دي الملكة القائمة عن يمين الملك.

في اليوم الأخير، في يوم الدينونة، مش العذراء هتبقى بتتحاسب، دي هتكون بتشفع في الناس اللي بيتحاسبوا. مش هي اللي بتتحاسب، دي هي اللي بتشفع في الناس اللي بيتحاسبوا. في يوم الدينونة، في اليوم الأخير، العدرا هتبقى جاية مع المسيح على السحاب.

لأن الكتاب بيقول: «إِنَّ (المسيح) الرَّبَّ أَتَى فِي رَبَوَاتِ قِدِّيسِيهِ» (يه 1: 14) مع ملائكته في ربوات إيه؟ قديسيه. وطبعًا في مقدمة القديسين العذراء مريم هتكون جاية معاه على السحاب.

ولما يجلس على كرسي مجده، هتكون على يمينه: «قَامَتِ الْمَلِكَةُ عَنْ يَمِينِكَ أيها الملك» (مز 45: 9). إذا كان الرسل ربنا قال لهم: لما يجلس على كرسي مجده هيجلسوا على 12 كرسي حواليه ويدينوا أسباط إسرائيل الاثني عشر (مت 19: 28) فكم بالأولى العذراء!

صاحب السؤال ما يخافش على العدرا أبدًا، يطمئن. المسيح مش هيقول: هيحسبها. يقول: أنا هسيبها، يعني أسيبها مبسوطة كده.

^{[1] سؤال أجاب عنه قداسة البابا شنوده في عظة بعنوان “الصلاة في الصوم” بكنيسة السيدة العذراء بجاردن سيتي. بتاريخ 21 مارس 1981م}