سؤال ما الفرق بين عيد الغطاس وأحد التناصير؟

سؤال:

 واحد بيقول: ما الفرق بين عيد الغطاس وأحد التناصير؟ ^[1]

الإجابة:

عيد الغطاس ده معمودية المسيح، وأحد التناصير ده معمودية الناس.

أحد التناصير ده إللي هو آخر أحد في الصوم الكبير قبل حد الزعف، آخر حد في الصوم الكبير قبل إيه حد الزعف.

كانت العادة قديمًا إن الموعوظين المُقبلين إلى الإيمان، يعني إللي عايزين يقبلوا المسيحية، كانوا بيعملوا لهم فصول اسمها “فصول الموعوظين” ياخدوا نوع من catechism، يقعدوا ياخدوا عظات يعدوهم فيها مع صيام طول الصيام الكبير، ويجي يعمدوهم يوم حد التناصير ويخشوا يشتركوا مع المؤمنين في حد الزعف وأسبوع الآلام. فكانوا بيسموه أحد التناصير.

لكن مش معناها إن الناس ما يتعمدوش غير في أحد التناصير بس دي كانت موجودة بالنسبة للقديم، ودي واضحة إللي فيكم يقرأ عظات القديس كيرلس الأورشليمي للموعوظين اللي كانوا يعدوهم للعماد خلال الـ lent، lent يعني الصيام الكبير.

وفي الآخر يتعمدوا يوم حد التناصير ويخشوا الكنيسة، ويحتفلوا بأسبوع الآلام، ويحتفلوا بعيد القيامة مع سائر المؤمنين.

^{[1] سؤال أجاب عنه قداسة البابا شنوده في عظة بعنوان ” كيف نعرف الله جـ3″ بتاريخ 5 فبراير 1992م}