أسئلة اللاهوت الطقسي

سؤال لماذا يلبس الكهنة ملابس سوداء؟

سؤال:

 واحد بيقول لماذا يرتدي الاَباء الكهنة ملابس سوداء؟ ^[1]

الإجابة:

 هو اللون الأسود في الحقيقة لون يدُل على الوقار.

 مش معقول الاَباء الكهنة هيلبسوا مزركش وملون وحاجات من النوع ده يعني، مش معقول. فاللون الأسود بيدُل على الوقار. زمان كان لما اتنين بيتجوزوا، كان الراجل بيلبس بدلة سودا نوع من الوقار يعني مش إللي هيحصله لأ.

حاجة تاني مُهمة، إن لبس السواد نوع من أنواع الموت عن العالم، الموت عن العالم. والآباء رجال الإكليروس ناس ماتوا عن العالم وعن الأشياء التي في العالم، فبيلبسوا اللبس الأسود كده، نوع من الوقار ونوع من الموت عن العالم. حتى تلاحظوا حاليًا تلاقوا السيدات الكِبار في السن عندنا مش ممكن يلبسوا ملون، يلبسوا ملون للشابات إللي لسه على وش الدنيا. لكن السيدات لما بيكبروا، صحيح الستات الكُبار إللي فوق الخمسين مثلًا أو الستين، طبعًا مفيش ستات بيوصلوا للخمسين أو الستين. الستات الكُبار بيلبسوا أسود تلاقوهم غالبيتهم كده، نوع من الوقار، لبس وقور.

 

^{[1] سؤال أجاب عنه قداسة البابا شنوده في عظة بعنوان ” يجرح ويعصب يسحق ويداه تشفيان” بتاريخ 11 نوفمبر 1987م}