سؤال بيقول ماذا قال مجموعة اليهود للسيد المسيح؟ وهل يوجد حديث بينهم وبين السيد المسيح؟

سؤال:

واحد بيقول ماذا قال مجموعة اليهود للسيد المسيح، وهل يوجد حديث بينهم وبين السيد المسيح؟ ^[1]

الإجابة:

كتير جدًا في الكتاب المقدس هتلاقي الحاجات دي، يكفي موقف اليهود مثلًا من معجزات السيد المسيح ومن المعجزات التي تمت في يوم سبت ده عنصر من العناصر، يكفي مثلًا احتجاج اليهود على المسيح في دخوله بيوت العشارين والخطاة موجودة في متى وموجودة في لوقا يعني هتلاقوا الحاجات دي كتير، كلام اللي بين اليهود والمسيح في إنجيل (يوحنا من أصحاح 6 لأصحاح 8)، وبعدين موقفهم منه في منح البصر للمولود أعمى في (يوحنا 9)، ودي مناقشات طويلة موجودة، وفيه أجزاء كثيرة من إنجيل يوحنا في مناقشات بينه وبين اليهود كتير أوي، حتى في إنجيل (يوحنا أصحاح 5) لما قال لهم: “أَبِي يَعْمَلُ حَتَّى الآنَ وَأَنَا أَعْمَلُ” أرادوا إنهم يقتلوه واعتبروه مجدف.

وفي (يوحنا أصحاح 10 آية 30) لما قال: “أَنَا وَالآبُ وَاحِدٌ” تلاقوا في (يوحنا 31:10) “امسكوا حِجَارَةً لِيَرْجُمُوهُ” (يو8: 59) ودخلوا معاه في موقف.

في إنجيل مرقس أنا في الكتاب اللي نشرته عن حياة القديس مار مرقس تلاقوا فصل كبير عن علاقة المسيح باليهود وموقفهم منه ممكن كلام متفصل وراء بعضه وراء بعضه وراء بعضه ومركز في النقطة دي بالذات تقدروا تشوفوها.

موقف اليهود منه في الأحداث السابقة على الصلب، وفي دخوله أورشليم، وفي المناقشات في الأسبوع الأخير بين المسيح واليهود، المناقشات اللي بينه وبين الكتبة والفريسيين مثلًا بخصوص الطلاق تلاقوها في (متى 19 وفي مرقس 10) تقريبًا الكلام هنا زي هنا.

موقفه من الصدوقيين في مسألة القيامة والمرأة اللي تزوجت سبعة أخوة تباعًا لأن كان الواحد فيهم بيموت قبل أن ينجب نسلًا فيريد أخوه أن يقيم نسلًا له تلاقوها في (متى 22) وتلاقوها في مرقس ولوقا.

موقفه من اليهود في مثل الكرامين الأردياء وافتكروا إنه بيقول عليهم وقال لهم: “مَلَكُوتَ اللهِ يُنْزَعُ مِنْكُمْ وَيُعْطَى لأُمَّةٍ تَعْمَلُ أَثْمَارَهُ” (مت21: 43) كلام كتير أوي موجود يعني مفروض واحد يعمل فيها بحث دي.

لكن واحد يقول ماذا قال مجموعة اليهود للسيد المسيح؟ إيه اللي قال دي؟ دي حاجات كتيرة جدًا جدًا ولا أنت لاقيت السؤال ده في كتاب وجاي تقوله غالبًا كدا ده ينفع بحث، بقى اليهود اللي قالوا للمسيح: “أَلَسْنَا نَقُولُ حَسَنًا: إِنَّكَ سَامِرِيٌّ وَبِكَ شَيْطَانٌ؟” (يو8: 48)، اليهود اللي قالوا للمسيح: “إِنَّهُ أَكُولٌ وَشِرِّيبُ خَمْرٍ” (مت11: 19) اليهود الذين قالوا للمسيح: “أَيَجُوزُ لَنَا أَنْ نُعْطِيَ جِزْيَةً لِقَيْصَرَ؟” (لو20: 22) اليهود الذين اتهموا المسيح اتهامات كثيرة، اليهود اللي قالوا: “دَمُهُ عَلَيْنَا وَعَلَى أَوْلاَدِنَا” (مت27: 25)، اليهود الذين حاكموا المسيح في مجمع السنهدريم، يا ابني هو أنا هكتب لك بحث دلوقتي؟ حاجات كتيرة تقدر تشوفها. 

^{[1] سؤال أجاب عنه قداسة البابا شنوده في عظة بالكلية الإكليريكية بتاريخ 31 مارس 1992م}