سؤال أنا عندي 60 سنة وواخد وحده عندها 37 وتكرهني وماشية مع واحد وحامل منه؟

سؤال:

واحد راجل سؤاله عجيب شوية… بيقول إيه؟ أنا عندي ستين سنة واخد واحدة عندها سبعة وتلاتين وتكرهني، وعايشين غُرب عن بعض لينا ست سنوات واكتشفت إنها بتحب واحد من سنها – وشوية كلام بلاش نقوله -، ولم أحد يسأل فيا لو ما لو ما أرسلتليش الرد دلوقتي حالاً اقتلها، – ده لسه – لو ما أرسلتليش الرد حالاً اقتلها ويبقى ذنبنا إحنا الاتنين في رقبتك؟ [1]

الإجابة:

ده يظهر رقبتي بدال رقبة الست إللي هتتدبح! لإيه؟

يا ابني وأنا ذنبي إيه بس؟ ده إللي بيقول: “نجنا من الدماء يا الله إله خلاصي” (مز50).

شوف يا حبيبي إذا كانت امرأتك زانية كما تقول وماشية مع واحد، ده بيقول أكتر من كده، بيقول: “ماشية مع واحد وحامل منه”، إذا كانت هي حامل لا تحمل أنت خطاياها إنما ممكن تطلقها لعلة الزنا، لا تقتلها ولا حاجة، واحدة زانية طَلقها لعلة الزنا، لكن تقتلها وتروح فيها وهي تموت في خطيتها وأنتَ يشنقوك وتبقى استفدت إيه؟ هي تموت في خطيتها، وأنت ياخدوك يشنقوك وتبقى ضيعت البيت، واستفدت إيه؟ مفيش حاجة كما إنك لو قتلتها هتقتل اتنين، هتقتلها هي وإللي في بطنها، لأن الواد مش هيقدر يطلع بتاع كام شهر كدا… هيبقى إيه الديك الفصيح من البيضة يصيح!

فأنتَ راجل بتاع ستين سنة يعني ناضج، هو من الأصل غلط إن واحد عمره ستين ياخد واحدة بتاع سبعة وثلاثين، أدي النتيجة زي ما شفتوا بتدور على واحد في سنها… فنتيجة غلطتك إنك اتجوزت واحدة صغيرة، يعني أنت بتاع ستين تاخد واحدة بتاع سبعة وخمسين، خمسة وخمسين، مفيش تاخد أم أربعة وأربعين… لكن تاخد واحدة بتاع سبعة وثلاثين اديك جبت لنفسك، المرأة الخاطئة إللي زي دي اطردها من البيت تروح بيت أبوها إلا لو قالت: أنا حامل منك، أه بيقول غُرب عن بعض خمس سنين.

طيب إذا كانت كده يبقى إما تطردها من البيت، لا إما تطلقها وأبعد عنها وتجيب لنفسك خطية ليه، ليه تجيب لنفسك خطية؟! دا بيقول في الآخر: “لدرجة مرة هما إللي الاتنين دخلوا عليَّ ولم أعرف أعمل شيء، اومال هتقتلها إزاي؟! دا هيقتلها على الورق…

بس بلاش بلاش ترتكب خطية هي عايزة تهلك نفسها، تهلك نفسها وأنت خليك بعيد عنها، اطردها من البيت أو طلقها لعلة الزنا بس مش تطلقها لعلة الزنا وتاخد بدالها واحدة عمرها 25 اديك جربت وشوفت اديك جربت وشوفت حاجة صعبة الناس دول.

^{[1] سؤال أجاب عنه قداسة البابا شنوده في عظة بعنوان “فلنبدأ بدءًا حسنًا” بتاريخ 1 يناير 1992م}