سؤال

امرأة زوجها مجنون، ماذا تفعل ولها مِنُّه ولدين؟ وهل يَحِّق لها في هذه الحالة، الطلاق وعن أي طريق؟ ^[1]

الإجابة:

الجنون ليس سَببًا في الطلاق، الجنون مرض ومفروض إن الزوجة إذا زوجها مِرِض تَعكَف على خدمته والعناية به، مش لما يمرَض تفَضَّل إنها تطَّلَقُه، الطلاق لعلة الزنى فقط، المسيح لم يذكر إلا علة الزنى سَببًا للطلاق، فما فيش أي سبب آخر.

^{[1]  سؤال أجاب عنه قداسة البابا شنوده في عظة بعنوان ” الحواس” السمع وأخطاؤه والأذن بين الروحانية والانحراف” بتاريخ 8 مارس 1974م}

سؤال، حدث خلاف بيني وبين امرأة أخي بسبب تَدَخُّلي لغضب والدتي، ومنذ مُدَّة وأنا ألاحظ تَغَيُّرها من ناحيتي وغيرِتها الشديدة من جهتي، ولذلك قَرَّرت أن أقطع علاقتي بها حِفظًا على راحتها هي وأخي، فهل هذا يَحرِمني من صومي وتناولي الأسرار المقدسة؟ أم أترك الصوم والصلاة لأني لا أستحق بسبب هذا الحادث؟ ^[1]

الإجابة:

أنا شايف إنك من النوع اللي بينفَعِل بسرعة وبيقَرَّر قرارات سريعة، يعني قرار قَطع العلاقات بسرعة كدة، وقرار تاني ممكن قَطع الصوم والصلاة لأني لا أستحق، ما تبقيش قراراتك سريعة كدة، أحسن دي تِتعِبِك في حياتك.

إذا كانت امرأة أخيِك واخدة على خاطرها مِنِّك، حاولي تصالحيها.

وأنا من رأيي بالنسبة للناس اللي يختِصروا الآخرين وما يختلطوش بيهم، لازم يَسبِق هذا علاقة محبة، لكن لو امتَنَعتي عن الناس وقبل كدة فيه خصومة أو زَعَل يبقى هيتحَوَّل الأمر إلى خصام وعداوة وكراهية، إذا ابتعدتي عن حد لأن صداقته ما تناسبكيش، إوجدي جو محبة وبعدين ابتعدي، لكن ما تبتعديش وفيه سوء تفاهم، وإلا الأمور تَتعَقَّد في قلبك وفي قلب امرأة أخيِك، اصلحي الجو.

كمان ما تيأسيش بسرعة في علاقاتك الاجتماعية، أنا شايف إنك من النوع اللي بييأس بسرعة، يعني أول اصطدام مع امرأة أخيِك، تقولي: أقطع العلاقات وما أقابلهاش وما أكَلِّمهاش حرصًا على راحتها وراحته، ده نوع من الفشل، نوع من الفشل في العلاقات.

إذا حصل بيننا وبين حد زَعَل، نحاول نرَيَّح الجو، نحاول نصطِلِح، نحاول نغَيَّر شعوره، وامرأة أخيِك إذا كُنتي زَعَّلتيها، تعالي في مرة من المرات اضحكي معاها، اكَلِّمي معاها، لاطفيها، اعتذري لها إذا كنتي اكَلِّمتي كلمة وِحشَة، يعني وَضَّبي الجو كدة بحكمة ولُطف، ما تبقيش جَد خالص كدة، يعني دَخَّلي شوية من اللُطف في علاقاتك.

وأحب أقول لك نصيحة أخرى: ما يصَحِّش في العلاقات العائلية يوجد التَحَزُّب والتَعَصُّب، يعني حصل مرات أخوكي بينها وبين والدتك حاجة، فانتي تزعلي لوالدتك، تنضَمِّي لوالدتك ضد مرات أخوكي، يبقى فيه حزبين في البيت، ليه تعملي كدة؟ امرأة أخيِك إنسانة جديدة على العيلة، انتي وأخوكي ووالدتك عيلة، ودي إنسانة جديدة دَخَلِت عليكوا، مَفروض إنكوا ما تِتحَزِّبوش ضدها كلكوا، وإلا تشعر إنها غريبة ومُضَّطَهَدَة وسط العيلة الجديدة، خَلِّيكي لطيفة معاها، وإذا كانت زِعلِت مع والدتك، إنتي اِنضَّمي لها ولاطفيها، وإن والدتك زَعَلِّتها، انتي صَادقيها، ما تخَلِّيهاش تشعر إن العيلة كلها بتنضَّم مع بعض ضدها، التَحَزُّب ده في العائلات مش كويس.  

حكاية أنا وأخويا على ابن عمي دية مش مش عبارة روحية أبدًا، مش عبارة روحية، عبارة تَحَزُّبيَّة وُجِدَت في التَعَصُّب القَبَلي، إن أنا وأخويا على ابن عمي وأنا وابن عمي على الغريب، كل ده كلام مش مظبوط، مفروض انت مع أخيك إذا كان الحق في جانب أخيك، وأنت تعاتب أخاك إذا كان الحق ضده.

مش معناها إن واحدة تنضَّم لوالدتها ضد مرات أخوها كدة بدون وَجه حق، حتى لو كان الحق في جانب والدتك، مش بسرعة تهاجمي إنسانة غريبة ضيفة عندكوا في البيت، مش من أصل العيلة، مفروض جاية عليكوا فانتوا تعاملوها معاملة طيبة، وبالهداوة وبالمحبة وبالصُلح توَضَّبي كل حاجة.

بلاش تقولي: أقطع علاقتي بيها، وطبعًا هتقطعي علاقتك مع أخوكي، ولا تزوري ولا يزوروكي وتعملي مشكلة، خَلِّي أعصابك هادية شوية، وصَلَّحي الجو مش تعَقَّديه.

^{[1] سؤال أجاب عنه قداسة البابا شنوده في عظة بعنوان ” الحواس” السمع وأخطاؤه والأذن بين الروحانية والانحراف” بتاريخ 8 مارس 1974م}

سؤال

أنا فتاة في السنة الأولى في الجامعة، أخشى من الاختلاط وأخافُه، وحاولت التَخَلُّص من هذا بأن أذهب في الرحلات الجامعية لأَتَعَرَّف على الأصدقاء ولكن أمي تمنعني من ذلك، وإني لا أعرف كيف سأقضي بقية السنين، ما السلوك الذي يجب أن تَسلُكه الفتاة الجامعية؟ ^[1]

الإجابة:

من جهة الاختلاط، انتي لا تخافين من الاختلاط بقدر ما تخافين من نفسك من الداخل، البنت القوية في نفسها من جوة، مهما اختَلَطِت لا تفُرَطِّ في نفسها ولا تُخطئ، لكن البنت الغلبانة، ممكن أي واحد يضحك عليها.

فانتي من أي نوع؟ ما أقدرش أجاوبك، مَفروض تكوني من النوع، اللي لو أي واحد كَلِّمِك تكوني ماسكة نفسك كويس ولا تفتحي قلبك لأي طارق يَطرِق عليه، يعني مفروض إنك تكوني حريصة، لأن جايز الاختلاط ده تُرغَمي عليه، افرِضي انتي لم تَبدأي بكلام أحد وحَد كَلِّمِك، تعملي إيه؟ تعرقي وتِقشَعِّري وتِرتِعشي وتِندَهي بوليس النجدة، أو تشتكي للحرس الجامعي أو حاجة زي كدة؟ مش معقول يا بنتي.

وافرِض إنك اشتغلتي، والشُغل فيه ناس، هتقولي إيه، لا يرفِدوا الموظفين اللي معاكي في الشغل لا ما تشتغليش؟ مش معقول، انتي مسيرِك هتختلطي بالناس، هتختلطي، بس لازم تكوني قوية من جوة، يكون قلبك قوي، تكوني تعرفي إزاي تَتَحَكَّمي في علاقاتك مع الناس، لا تكوني سهلة في التعامل بحيث إن أي واحد يشِدِّك في سِكَّة تِتشَدِّي معاه، خَلِّيكي حكيمة وعاقلة وافهمي الناس، وافهمي الناس.

وأمك خايفة عليكي، جايز أمك عارفة طباعك وعارفة إنك انتي ضعيفة، ممكن أمك تروح معاكي الكلية، طبعًا حاجة مش معقولة.

بتقولي: إن أنا فكرت أن أذهب في الرحلات الجامعية لأَتَعَرَّف على الأصدقاء، طبعًا ليس هدف الرحلات إنك تَتعَرَّفي على الأصدقاء، مش مَفروض إنك انتي اللي تِتعَرَّفي ، مَفروض تروحي الرحلة من أجل الرحلة، يعني رايحين مثلًا المتحف، تروحي عشان المتحف، تِتفَرَّجي عليه، مش تروحي تِتعَرَّفي على الأصدقاء.

سؤال أيضًا بالنسبة ليكي، ما فيش اختلاط عندك في العيلة، في القرايب، في الجيران؟ بتعملي إيه في الحاجات دي؟

كَحَل وَسَط، إذا كنتي بتختلطي في الجامعة، خَلِّيه اختلاط مُشتَرَك، يعني إذا كَلِّمتي ولد، كَلِّميه ومعاكي بنتين تلاتة، قوم هيكون الكلام وَسط البنات، مش هيجرى حاجة، وإذا كَلِّمِك واحد لوحدك، ما تِديلوش فرصة يكَتَّر الكلام، رُدِّي رَد بسيط وإستأذني لغاية لما تبتدي تاخدي على الناس وتعرفي الجو ماشي إزاي.

^{[1]  سؤال أجاب عنه قداسة البابا شنوده في عظة بعنوان ” الحواس” السمع وأخطاؤه والأذن بين الروحانية والانحراف” بتاريخ 8 مارس 1974م}

سؤال

عن العفة، بيقول: العفة في وسط النياحات لا تَثبُت بغير فساد كما إن الجوهرة في وسط النار لا يُحفَظ شعاعها بغير فساد؟ ^[1]

الإجابة:

العفة في وسط النياحات، كلمة نياحة يعني راحة، فالنياحات يعني الراحة، بيقصدوا إن التَرَّفُه الكتير والتَنَّعُم الكتير لا يُساعد على العفة، العفة تحتاج لإنسان بيكون ضاغط على جسده، ما يكونش مُتَنَّعِم ولا مُتَرَّفِه، ده الكلام المقصود.

^{[1] سؤال أجاب عنه قداسة البابا شنوده في عظة بعنوان ” الحواس” السمع وأخطاؤه والأذن بين الروحانية والانحراف” بتاريخ 8 مارس 1974م}

سؤال

بيقول: قرأت في بستان الرهبان هذه الجُمَل وأرجو تفسيرها، قال أنبا أثناسيوس: مَن يُعاقِبَك ويوَبِّخَك على زَلَّاتِك أَحِبُّه مثل نفسك واتَخِّذه لك صديقًا؟ ^[1]

الإجابة:

القديس أثناسيوس بيقول: اللي يوَبَّخَك على زَلَّاتَك، حِبُّه زي نفسك واتَخِّذه لك صديقًا.

صاحب السؤال بيقول: هذا يَتَعَارَض مع وصية لا تدينوا لكي لا تُدَانوا.

هو القديس أثناسيوس مش بيكَلِّم على الشخص اللي بيوَبَّخ، بيتكلم على الشخص اللي بيتوَبَّخ، فإذا حصل وفيه إنسان وَبَّخَك وكَلِّمَك على خطاياك، انبِسِط إنه بيكشِف لك ضعفاتك، يعني ينبغي أن تُسَر إنه بيكشِف لك ضعفاتك عشان ما تعملهاش تاني.

فاتَخِّذه لك صديقًا، لأن جايز إنت بتُقَع في خطايا وفي نقائِص والناس مَكسوفين يقولوا لك، والخطايا دي ثابتة عندك، فبيقول لك: اللي بيدَوَّر على صالحك وبيقول لك خطاياك اتَخِّذه ليك صديق.

لكن الشخص التاني إللي بيوَبِّخ، ما اكَلِّمش عليه القديس أثناسيوس، دي تَتَوَقَّف على الروح إللي بيوَبَّخ بيها، هل هو بيوَبَّخ بطريق إدانة أم بطريقة محبة، تختِلِف من واحد لواحد.

^{[1] سؤال أجاب عنه قداسة البابا شنوده في عظة بعنوان ” الحواس” السمع وأخطاؤه والأذن بين الروحانية والانحراف” بتاريخ 8 مارس 1974م}

سؤال

مكتوب في الإنجيل وبالتحديد في الإصحاح الخامس من إنجيل متى: “لا تحلف برأسك لأنك لا تقدر أنك تجعل شعرة واحدة بيضاء أو سوداء”، لا تحلف بشعر رأسك لأنك ما تقدرش تجعل شعرة بيضاء أو سوداء، ما رأيكم الآن في صبغات الشعر التي تُحَوِّل لون الشعر كله أبيض وأسود؟ ^[1]

الإجابة:

الصبغة، الصبغة لا تُغَيِّر لون الشعرة، لأن افرِض واحد شعرُه أبيض وعمل صبغة سودا، بعد أسبوع أو أسبوعين تلاقيه رِجِع أبيض زي ما كان، مجرد طلاء خارجي بيزول بزَوَال الوقت، لكن طبيعة الشعرة، طبيعة الشعرة وايه اللي دَخَل في تركيبها وخَلَّاها بيضا أو سودا، يعني هل مثلًا امرأة كبيرة السن وشعرها أبيض، لما تصبغ شعرها أسود تبقى صَبِيَّة بنت 16 سنة؟ مش معقول.

الشَعر نفسه، الشَعر نفسه بيعَجِّز ويضعف وبيبقى أبيض، وتركيبُه، تركيبُه كشعرة يعني لما تاخد الشعرة وتحَلِّلها وتشوف تركيبها من جوة تَجِدُه اِختَلَف خالص مهما صبغتها.

هل انت مثلًا لما يكون واحد أبيض، وِشُّه أبيض وبعدين بيمَثِّل دور راجل زِنجي وعمل وِشُّه بالمكياج، بقى أسود هل هو تَحَوَّل إلى زنجي وغَيَّر جلدُه؟ كلها حاجات من الخارج.

فالألوان لا تُغَيِّر طبيعة الشعرة ولا تجعلها ثابتة في لوٍن معين إنما هي طلاء خارجي يَضعُف بالوقت ويزول، عشان كدة اللي بيصبغوا شعرهم، كل شوية والتانية يصبغوه، وحتى لما يصبغوه إن ما عملوش الصبغة مظبوطة، يبان حِتَت بيضا وحِتَت سودا، أو لو طِولِت الشعرة يبقى الحتة اللي طالعة بيضا والحتة الفوقانية سودا وتبقى مكشوفة الحكاية، فما بيقدرش الواحد يغَيَّر طبيعة الشعر.

اطمئن يعني، الآية ما، الآية ما إتغَيَّرِتش.  

 

^{[1] سؤال أجاب عنه قداسة البابا شنوده في عظة بعنوان ” الحواس” السمع وأخطاؤه والأذن بين الروحانية والانحراف” بتاريخ 8 مارس 1974م}   

سؤال، لماذا نقول: إن اليهود هم أعداء الله لأنهم صلبوا السيد المسيح له المجد، في حين إن تَجَسُّد السيد المسيح كان لأجل خلاصنا عن طريق هذا الصَلب؟ ^[1]

الإجابة:

اليهود لم يقصدوا الخلاص، يعني لما صلبوا المسيح لم يقصدوا الخلاص، زي يهوذا لما خان سيده، ما كانش يقصد خلاص البشر، هي المسألة بالنِيَّة من جوة، هما صلبوا المسيح حَسَدًا وغَيرًة مِنه ونُكرانًا لجميِله عليهم، ولم يكن في قصدهم إطلاقًا خلاص البشرية.

ثم أيضًا هم لم يؤمنوا بالمسيح، لم يؤمنوا بالمسيح، الكتاب بيقول: “إلى خاصته جاء وخاصته لم تقبله”، فَهُما رفضوه، رفضوه وَدَبَّروا المؤامرات ضده وصلبوه، ولم تكن لهم نِيَّه صالحة في هذا الصَلب.

^{[1]  سؤال أجاب عنه قداسة البابا شنوده في عظة بعنوان ” الحواس” السمع وأخطاؤه والأذن بين الروحانية والانحراف” بتاريخ 8 مارس 1974م}

سؤال

بيقول: قرأت هذه العبارة في صلاة النوم: “طوبي لمَن يُكَافِئِك مكافئتك التي جازيتنا طوبي لمَن يمسَك أطفالك ويدفنهم عند الصخر؟” [1]

الإجابة:

هو بيقول: يا بنت بابل الشَقِيَّة طوبي لمن يُكَافِئِك مكافئتك التي جازيتنا، وأول المزمور بيقول: “على أنهار بابل هناك جلسنا فبَكينا عندما تَذَكَّرنا صهيون”، ده مزمور بيُقال عن السَبي، إنسان في السَبي ويَشتَاق لوطنه، وبنعتبر إن الوجود في الخطية حالة سَبي، فهنا الكلام كان أيام سَبي بابل.

فيا بنت بابل الشَقِيَّة، يعني يا أيتها الخطية التي أوصَلتِنا إلى السَبي، طوبي لمَن يُكَافِئِك – يُكَافِيء هذه الخطية- مكافئتك التي جازيتنا، طوبي لمن يَمسِك أطفالك ويدفنهم عند الصخرة، يعني يمسِك الخطايا وهي صغيرة قبل ما تكبر، قبل ما تَتَأَصَّل في قلبه ويدفنهم عند الصخرة “والصخرة كانت المسيح”.

فبيكَلِّم على الخطايا التي أَوصَلَتهُ إلى السَبي ولا يتَكَلَّم عن الناس، يعني خُدها بمعناها الروحي مش بمعنى حَرفي.

^{[1] سؤال أجاب عنه قداسة البابا شنوده في عظة بعنوان ” الحواس” السمع وأخطاؤه والأذن بين الروحانية والانحراف” بتاريخ 8 مارس 1974م}

سؤال

إذا كان شخص لا يؤمن بوجود الله، فإزاي نقنعه؟ ^[1]

الإجابة:

هأقول باختصار كلمتين قولتهم لناس كتير، لكن بالنسبة للناس اللي بينكروا وجود الله، ما بيعرفوش يردوا على الكلمتين دول.

أول كلمة: وجود الحياة في العالَم، كيف وُجِدَت الحياة في العالَم؟ المعروف إن الأرض كانت قطعة ملتهبة من الشمس وكانت حرارتها الشديدة لا تسمح بوجود حياة، أي حياة، لا حياة نبات ولا حيوان ولا إنسان، فكيف وُجِدَت الحياة؟ مازال هذا السؤال لُغزًا، لا يُعَلِّلُه إلا وجود الله، حتى الآن العالَم الذي وصل إلى درجات عالية جدًا في العلم، لم يستَطِع أن يوجد خلية حية واحدة، مجرد خلية حية واحدة، هيجيب منين الحياة؟

الإنسان كما قال بعض العلماء، مُرَّكََبات جسمه، مُرَّكَبات جسمه كلها يمكن من مواد ما يجيش تمنها ريال، يعني عشرين قرش ولا خمسة وعشرين قرش، كمية ما فيه من حديد وكالسيوم وماغنسيوم وبوتاسيوم ونحاس، مُرَّكبات جسم الإنسان يعني، وميَّة، فيه ميَّة كتير، يا دوبك تجيب ريال، جايز في في غلو الحديد في أيامنا دية وفي غلو بعض المواد، يمكن يطلع ب 25 قرش ولا حاجة أو ب 30.

ومع ذلك إذا جبتم هذه المواد كلها، ما تستطيعوش تطَلَّعوا منها إنسان أبدًا، يعني خُذ مُرَّكَبات الإنسان، كل ال Minerals اللي موجودة فيه، وحاول تطَلَّع منها إنسان، ما تعرفش، بل هات إنسان بجسمه اللي متكَوِّن جاهز، وطلعت مِنُّه الروح، وحُط كل العلماء جمبه وشوف كيف يعطونه حياة، مش ممكن، والأنسجة هي الأنسجة، والأعضاء هي الأعضاء، والتركيب هو التركيب، كيف توجد الحياة؟ الحياة حتى الآن لُغز لم يستطع العلم في أعماقه وعلُّوِه إنه يَصِل إلى إيجادها.

ساعات ناس بيلجأوا إلى طُرُق التَفريخ، حتى بالنسبة للإنسان، ياخدوا نَطفَة حية من ذكر ومن أنثى ويحطُوهم في برطمانات، في حاجات ويحاولوا يكَوِّنوا جنين، لو استطاعوا حتى، برضُه فيه مادة حية خدوها، لكن هل يمكن إيجاد حياة من شيء غير حي؟ جات منين الحياة؟ ما فيش، وكل الذين ينكرون وجود الله لا يستطيعون أن يجيبوا على هذا السؤال، كيف وُجِدَت الحياة؟ احنا بنقول: اللي أَوجَد الحياة هو الله، فإذا كان عندهم إجابة أخرى، يقولوها، ولن يجدوا إجابًة أخرى، مش ممكن.

ساعات ناس يقولوا: الطبيعة، طب إيه هي الطبيعة، تطلع إيه الطبيعة دي، إيه هي الطبيعة، الجبال والأنهار؟ طب هات لي جبل يطَلَّع لنا كتكوت ولا يطَلَّع لنا نملاية حتى، ما فيش، بغض النظر عن المَثَل اللي بيقول: تَمَخَّض الجبل فوَلَد فأرًا، لكن ما فيش، يعني ما فيش ما فيش طبيعة جامدة، ما فيش طبيعة جامدة بتوجِد طبيعة حية، لأن فاقد الشيء لا يعطيه، فإيه هي الطبيعة؟

إلا لو كانت الطبيعة اسم من أسماء الله، يعني، يعني قوة خارقة للعادة، الخلاف خلاف مُسميات، المهم إن احنا نؤمن بوجود قوة خارقة للعادة، اللي هي بنسَمِّيها: الله، أَوجَدِت كل الحاجات دي.

حاجة تاني غير وجود الحياة وهي أصعب من وجود الحياة: وجود المادة، كيف وُجِدَت المادة؟ يعني حتى لو قِدِر العلم بكل ما عنده -ودي مستحيل، مستحيل، مستحيل- حتى لو قِدِر ياخد مادة ويحِوِّلها إلى حياة، لكن كيف توجد المادة، مَن الذي أَوجَد المادة؟

افرض إنت مسكت حتة طينة وقعدت تلعب فيها لغاية ما بَقِت عصفورة -وده مستحيل- لكن منين تجيب الطين؟ من الذي أوجد الطين؟ ده مجرد وجود ذرة تراب دليل على وجود الله، منين جات ذرة التراب؟

وجود الحياة دليل على وجود الله، حتى لو كانت حياة في أبسَط صورها، كذلك وجود المادة، من أين وُجِدَت المادة؟ وبرضُه يبقى السؤال بلا جواب، إيه اللي أَوجَد المادة، إيه اللي أَوجَد المادة، من أين أَتَت؟ لا نستطيع نقول نقول: جات لوحديها، ما لهاش معنى كلمة جات لوحديها، كلمة جات لوحديها دي مش إجابة، إيه اللي جابها؟

ثم أيضًا من الصعب أن ننادي بأزلية المادة، لأن المادة واضح فيها عنصر الضعف، لأن بنقدر نغَيَّرها من حالة لحالة، والمُتَغَيِّر ضعيف، يعني بنقدر الميَّة نحَوِّلها إلى بخار، والبخار نقدر نحَوِّله ميَّة والميَّة نحَوِّلها لتلج، بنغَيَّرها من حالة لحالة.

بلاش التَغَيُّر ده، المادة يمكن أن تَتَحَوَّل إلى طاقة، والطاقة ممكن أن تُستَهلَك ومش ممكن ترَّجَعها مادة مرًة أخرى، مستحيل، يبقى ضاعت كمادة، يعني جايز عندك مادة زي فحم، أشعلتها بنار، دَوَّرت بيها مَكَنَة، حَوَّلتها لطاقة، لكن بعد ما تَتَحَوَّل لطاقة مش ممكن ترَّجَعها مادة، إذًا المادة ممكن تضيع كمادة، كمادة يعني، كون إنها مادة ما تلاقيهاش ليها وجود، فمستحيل تكون المادة أزلية واحنا بنقدر نَتَصَرَّف فيها ونتَحَكِّم فيها ونغَيَّر فيها ونوَضَّب فيها، فمن أين أَتَت المادة؟

فيه شيء آخر عجيب موجود، الناس برضُه ما بيقدروش يشوفوا له إجابة وهو وجود النظام في الكون، الَفَلك اللي بيمشي بقوانين عجيبة، بنظام عجيب، الأرض اللي بتلِّف حوالين نفسها لَفَّات منتظمة، بتكَوِّن الليل والنهار ودورات حوالين الشمس بتكَوِّن الفصول بطريقة لا تَتَغَيَّر ولا تَتَبَدَّل، حركات النجوم والكواكب وقوانين الفَلَك، النظام ده جِه منين؟ لابد فيه مُنَظِّم.

خدوا جسم الإنسان بكل ما فيه من نظام ومن دقة عجيبة، ده هاتوا لسان مثلًا بتاع واحد، بلاش جسم الإنسان كله، خدوا لسان، اللسان عبارة عن آلة موسيقية منتظمة الأوتار بشكل عجيب، تَجِد فيها الدو والري والمي والفا والصول، كله ماشية كدة بطريقة عجيبة، ولو حصل إن إنسان لسانه بس جِه جِه فيه عيب واحد زي تأتأة ولا ولا لَعثَمَة ولا لدغة ولا لكنة، العلم كله ما بيقدرش يصلَّحه، مش العلم كله ما بيقدرش يعمل لسان، ده ما يقدرش يصَلَّح ثأثأة اللسان، ما يقدرش يصلَّحها، إيه النظام العجيب الموجود بالشكل ده؟ وإيه العين اللي موجودة بطريقة كعدسة عجيبة فيها كل الدقة الموجودة، بحيث لو جرى لها أي حاجة، العلم كله ما بيقدرش يعمل زَيَّها، فيه نظام عجيب.

يكفي إن الإنسان لو ميكروب دخل جسمه، تَجِد الجسم كله يَتَيَّقَظ وقوات دفاعية وهجومية وإنذارات بتخرج عن طريق حرارة توري الناس إن الجسم ده تعبان أو عن طريق رعشة أو أي حاجة، وتقوم الكرات الدموية الحمراء والكرات الدموية البيضاء وعبارة عن جيوش بيشتغلوا جوة الجسم، إيه الشغلانة دي؟ لقمة الواحد ياكلها وتبُص تلاقي الجسم بقى اللي بيفرز عصارات من هنا، واللي بيجيب عصارات من هنا، واللي بيهضم، واللي بياخد، لغاية لما اللقمة دي تِتحَوِّل لشوية دم، إيه إيه المَكَن العجيب اللي جوة الإنسان ده، إيه النظام ده، جِه منين؟ هتجاوب تقول إيه؟ فيه نظام عجيب لابد إن له مُنَظِّم، لابد له مُنَظِّم.

أو ساعات واحد يزعل من ربنا لأنه بيطلب مِنُّه طلب ما جالوش، فيقول: ربنا إيه ويُعُد يلخبط في ربنا، فإما لنا رغبات الله يُعارِضها أو لنا طلبات الله لم يُحَقِّقها، دي الحاجات اللي بتخَلِّي الإنسان يزعل من ربنا.

لكن وجود الله دي مسألة سهلة، احنا ممكن نُدرِك وجود الله في حياتنا العملية وإيد الله اللي بتُصَرِّف حياتنا بطريقة أكتر من المناقشة، أكتر من الجَدَل الفكري، أكتر من الجَدَل الفكري.

الذين يؤمنون بوجود الله بيستريحون بالإيمان، والذين لا يؤمنون بيقلقون بالإنكار، يعني اللي بينكر وجود الله بيتعب، الأفكار بتحَطِّمه، لكن اللي بيؤمن، بيَجِد راحة وتَسليم وفرح وسرور في إيمانه بوجود قوة جمبه بتحميه وبإله خالق بيُعِّد له مكانًا في السماء، كمان اللي ينكر وجود الله هينكر الثواب والعقاب والدينونة وينكر كل حاجة، وينكر الحياة الأبدية ويبقى يعيش بلا أمل وبلا رجاء.

^{[1] سؤال أجاب عنه قداسة البابا شنوده في عظة بعنوان “الرجاء”، بتاريخ 1 فبراير 1974م}

سؤال

فيه ترتيلة بتقول: مجدُ مريم يَتَعَظَّم في المشارق والغروب، إلى آخره، ما رأيكم في كلمة مجد، هل في هذه التسبحة يَنتَسِب المجد للسيدة العذراء؟ لأن أحد الواعظين قال هذا، وأنا اريد أن أسمع جواب من فمك؟ ^[1]

الإجابة:

طبعًا فيها مجد للعذراء، والعذراء مَجَّدها المسيح من تلقاء نفسه وأعطاها مجد أكثر من أي أحد، المزمور يقول: “نساٌء كثيراٌت نِلن كراماٍت ولم تنل مثلك واحدة منهن”، مريم أخذت كرامة أكتر من جميع النساء ولذلك سُمِيَّت: السماء الثانية، في التسبحة بنسُمِّيها: السماء الثانية لأن السماء بيَحِّل فيها الله ومريم حَلّ فيها الله الكلمة، مريم العذراء في التسبحة بنجعلها فوق الشاروبيم وفوق السارافيم، بنقول: عَلَوتِ يا مريم فوق الشاروبيم وسَمَوتِ يا مريم فوق السارافيم.

في الكنيسة العذراء بتجعل مريم قبل رؤساء الملائكة، بتذكرها في الاِستشفاع قبل رؤساء الملائكة، فمريم العذراء لها مجٌد كبير، وهي قالت: “هوذا منذُ الآنَ جميعُ الأجيالِ تُطَوِّبُني”.

لعل صاحب هذا السؤال يفتكر إن المجد لله وحده، ربنا بيقول: “مَن يُكرِمكم يُكرمني”، وبيعطي كرامة لأولاده ويُعَظِّمهم كثيرًا، ويعتبر إن أي إكرام مُوَجَّه ليهم، مُوَجَّه ليه هو شخصيًا، فما فيش عيب أبدًا إن احنا نسمع تمجيد في العذراء، لأن احنا بنعمل لها ذكصولوجيات كثيرة في الكنيسة، وكلمة ذكصولوجية يعني تمجيد، ذوكصا يعني مجد، ولوجية يعني كلام، ذكصولوجية يعني كلام في المجد، ولما احنا بنُمَجِّد العذراء إنما بنُمَجِّد المسيح نفسه الذي حَلّ فيها.

^{[1] سؤال أجاب عنه قداسة البابا شنوده في عظة بعنوان “الرجاء”، بتاريخ 1 فبراير 1974م}