سؤال بيقول كنت أعتقد إن ما ورد في نحميا ٨ هو خاص بترجمة ما قيل من العبرية إلى الآرامية وما هو الوحش 666؟

سؤال:

 واحد بيقول كنت اعتقد أن ما ورد في (نحميا 8: 8) هو خاص بترجمة ما قيل من العبرية إلى الآرامية لأنهم لم يكونوا يعرفون العبرية؟ ^[1]

الإجابة:

 وده برضو صح لأنهم في أرض السبي اختلفت اللغة بتاعتهم، لكن أنا أقصد من هذا الكلام إن ممكن يشرح الكلام ويفسر للناس سواء من جهة اللغة أو من جهة التعليم يعني هو الناس بيعرفوا كل ما ورد حتى الآن؟ طب بلاش ده تعالوا أنتوا في الكتاب المقدس المترجم للغة العربية وقولوا لي الوحش 666 يعني إيه؟ حد فاهم؟ ولا فاهم!

إقرارًا للحق أنا لما سُئلت في الخارج عن الوحش 666 يطلع إيه؟

فقلت لهم في رأيي الخاص إن الوحش 666 هيكون هو Antichrist اللي ورد في (تسالونيكي التانية أصحاح 2) اللي هو قيل عنه إن هو “الْمُقَاوِمُ وَالْمُرْتَفِعُ عَلَى كُلِّ مَا يُدْعَى إِلَهًا أَوْ مَعْبُودًا، حَتَّى إِنَّهُ يَجْلِسُ فِي هَيْكَلِ اللهِ كَإِلَهٍ” وهو اللي هيكون سبب في الارتداد العام، ويعمل آيات وقوات، وعجائب بكل قوة الشيطان.

ولأن في سفر الرؤيا بيقول إنه “اسم إنسان” اسم إيه؟ إنسان لأنه ليس هو دولة ولا هيئة ولا دين إنما هو اسم إيه؟ إنسان زي ما ورد في (سفر الرؤيا أصحاح 13 في آخر آية، آية 18) “هُنَا الْحِكْمَةُ! مَنْ لَهُ فَهْمٌ فَلْيَحْسُبْ عَدَدَ الْوَحْشِ، فَإِنَّهُ عَدَدُ إِنْسَانٍ، وَعَدَدُهُ: سِتُّمِئَةٍ وَسِتَّةٌ وَسِتُّونَ”. هو عدد إيه؟ إنسان يعني هو إنسان وأكبر دليل على كده… بلاش أكبر دليل، من الأدلة اللي ممكن أن تقال ما ورد في (رؤيا20: 10) بيقول: “وَإِبْلِيسُ الَّذِي كَانَ يُضِلُّهُمْ طُرِحَ فِي بُحَيْرَةِ النَّارِ وَالْكِبْرِيتِ، حَيْثُ الْوَحْشُ وَالنَّبِيُّ الْكَذَّابُ. وَسَيُعَذَّبُونَ نَهَارًا وَلَيْلًا إِلَى أَبَدِ الآبِدِينَ” آمين. يعني أكتر الناس اللي يضلوا العالم هما التلاتة دول وسيعذبون إلى أبد الآبدين آمين، فغالبًا الوحش ده 666 اللي اسمه إنسان هو بتاع الوحش لأنه هو اللي هيضل العالم ويسبب الارتداد.

^{[1] سؤال أجاب عنه قداسة البابا شنوده في عظة بالكلية الإكليريكية بتاريخ 31 مارس 1992م}