سؤال بيقول بمناسبة فصل الصيف إيه رأيكم في الفتيات المسيحيات اللي بيروحوا الكنيسة بملابس غير محتشمة؟

سؤال:

 واحد بيقول لي بمناسبة فصل الصيف وظهور الفتيات المسيحيات بملابس قصيرة جدًا وفي حالة سيئة للغاية، حيث يكون معظم جسمها باين (قل: بعض، قل: قليل، قل: نُدرة، لكن تقول ظهور الفتيات المسيحيات كده تلمّهم بالجملة؟! ده أنت يا أخي صعب!)، وتكون موضع إثارة للشباب وكلام الآخرين عليها إنها لابسة صليب ومسيحية وغير محتشمة، وللأسف كمان رايحة الكنيسة، وإحنا في أيام صعبة جدًا؟ ^[1]

الإجابة:

إحنا بناتنا محتشمين، وما تخافش عليهم، وما تظنش الصيف يعني هو بتاع الملابس القصيرة يعني. طيب، إيه بقى يعملوا في البلاجات والناس اللي بيخشوا يدوبك بورق التين، لا تزيد عن هذا الأمر هتقول إيه؟ تقول: من يأتيني بهؤلاء لأعاقبهم.

الحشمة هي ليست حشمة مناسبات، وليست حشمة صيف. والحشمة ليست فقط في الملابس، وإنما أيضًا بالإضافة إلى الملابس في المساحيق والتبرج، وفي الضحك العالي اللي ملهوش لازمة، والسلوك اللي مش تمام، والهزار، إلى آخره.

والحشمة تكون في القلب، وتنبع من القلب إلى المظاهر الجسدية، لكن تكون في القلب أولًا. وإحنا لما نعلّم البنات الحشمة، نعلّمهم في داخلهم، في قلوبهم، في أفكارهم، في روحياتهم، وبعد كده هتلاقي كل حاجة تمشي مظبوطة.

^{[1] سؤال أجاب عنه قداسة البابا شنوده في عظة بالكلية الإكليريكية بتاريخ 31 مارس 1992م}