سؤال أنا متزوجة من 24 سنة ولم أُنجب حتى الآن فما رأي قداستك في الحمل عن طريق أطفال الأنابيب؟

سؤال:

واحدة بتقول: أرجو الرد هذه المرة حتى لا أعمل شيء يُغضب الله. (إيه بقى اللي عايزه تعمله؟) بتقول: سبق أن أرسلت لك بإني متزوجة من 24 سنة ولم أُنجب حتى الآن. فما رأي قداستك في الحمل عن طريق أطفال الأنابيب؟ ^[1]

الإجابة:

أنا اتكلمت عن الموضوع ده قبل كده كتير، يا ريت تشوفي إجابتي عن الموضوع ده ولا أبقى أكتبها لكوا في المجلة ولا غيره، بدال ما كل شوية أقول الأنابيب الأنابيب الأنابيب يعني مش معقول! بس أنتِ يعني افتكرتي بعد 24 سنة ما عرفش بردو بعد 24 سنة دي تبقى إيه؟! طب بلاش، هل المرأة بعد زواجها بـ 24 سنة يكون عندها بويضات صالحة للإخصاب؟ دي مسألة عايزه كلام. لأن البعض مرة سألني ما معنى امرأة وصلت إلى سن اليأس؟

حاجة موجودة في الكُتب يعني طبعًا مفيش رجالة بيقولوا عليهم سن اليأس لكن… وسن اليأس دي مش مقصود بيها ناحية نفسية، مقصود إن المرأة وصلت إلى سن تيأس فيه من أن تُنجب تيأس فيه إيه؟ من أن تنجب، يعني إما ما تكونش تقدر تجيب بويضات يعني صالحة للإخصاب أو ما فيش خالص، أو الحاجة اللي يكون نقول ينبوعها قد جف ودي تتفهم أنتوا تفهموا معناها إيه، فعشان كدا بيقولوا سن اليأس وجايز هي تكون معنوياتها زي الحديد في أمور أخرى بس من ناحية الإنجاب تيأس أن تُنجب، ففي الأول قبل الست دي ما تفكر في أنابيب أو غير أنابيب اقترح يعني كإجراء مبدئي إنها تكشف على نفسها وعلى زوجها تشوف عندهم قدرة على الإنجاب ولا لأ، وبعدين نبقى نشوف الخطوة التانية تبقى إيه. بدال ما تخشي في أنابيب وتحط في الأنابيب حاجة فاضية ما بتعملش حاجة، فيعني فكري في الأول تعملي تحاليل.

^{[1] سؤال أجاب عنه قداسة البابا شنوده في عظة بعنوان “كيف نعرف الله ج2” بتاريخ 29 يناير 1992م}