سؤال واحد بيقول في المحاضرة السابقة قلتم إن الآب هو الأصل ما معني ذلك؟

سؤال:

واحد بيقول: في المحاضرة السابقة قلتم إن الآب هو الأصل، ما معنى ذلك؟ هل بذلك إن الابن ليس له وجود منذ الأزل، أو إن الله أوجده؟ ^[1]

الإجابة:

ماحدش قال كده يا ابني أبدًا. معنى كلمة أصل هي الأساس في كل شيء.

هجيب لك مثل بسيط عشان تفهم يعني إيه كلمة أصل. يعني لما تقول: النار ينبثق منها ضوء، وتتولد منها حرارة. النار يحصل منها إيه؟ ينبثق منها ضوء، ويتولد منها حرارة. فنقول النار هي الأصل، والحرارة بتتولد من النار. لكن مش معناها لما الحرارة بتتولد من النار إن النار تسبقها في الزمن. لأ. حيثما توجد حرارة توجد النار.. آسف.

حيثما توجد نار توجد حرارة، حيثما توجد نار يوجد ضوء، مع إن هي الأصل، وبيخرج منها الضوء، وبتخرج منها الحرارة. فلا تعتبر إن كلمة أصل تعني إن ما يتولد منه لازم يوجد بينه وبينه فارق زمني أبدًا. في مثل النور والنار والحرارة مفيش فارق زمني. لما تقول الشمس هي الأصل، ويخرج منها شعاع، وتخرج منها حرارة، هل معناه إن هي سابقة للشعاع أو سابقة للحرارة؟ بتخرج منها الحرارة دون فارق زمني، ويخرج منها الضوء دون فارق زمني.

فماتخليش الحكاية تكبر عندك شوية كده وتقول: هل معناها الابن غير أزلي؟ ما حدش قال كده. الآب هو الأصل، وبيخرج منه الابن، وإلا ليه سميناه آب؟

^{[1] سؤال أجاب عنه قداسة البابا شنوده في عظة بالكلية الإكليريكية بتاريخ 11 فبراير 1992م}