سؤال واحد بيقول التجأت إلى قداستكم في هذه المشكلة لانها للأسف الشديد أحد الآباء نصب عليَّ؟

سؤال:

واحد بيقول: التجأت إلى قداستكم في هذه المشكلة لأنها للأسف الشديد صدرت من أحد الآباء وقال: اسمه القمص إسحاق السرياني اللي قال عن نفسه: إنه ساكن في البطريركية وله قلاية في دير مار مينا ويظهر نصب عليهم ولا حاجة؟ ^[1]

الإجابة:

ما عندناش هذا الاسم إطلاقًا، يعني الاسم اللي بتقوله ده ما عندناش، ففي ناس محتالين ممكن إنهم يدعو أي صفة وأي اسم فأنتوا تحترسوا من هؤلاء الناس.

وأنا قُلت لكم المجمع المقدس بيقول: الراهب ما يخشش بيت من البيوت وما يكنش ليه علاقة بعائلات، وإذا كان يبات يبات في الكنيسة. لكن ده يقول لك حتى أنتوا يعني كان مفروض إنكوا تفكروا تفكير عميق شوية.

واحد يقول لك: ساكن في البطريركية ما عندناش حد ساكن في البطريركية وليه قلاية في دير مار مينا! إزاي سرياني وإزاي قلاية في دير ما رمينا؟ إحنا نحقق في الموضوع ده، لكن ما عندناش رُهبان بهذا الاسم يا ابني، ولو كان عندنا رهبان بهذا الاسم ما كنتش ذكرت اسمه في اجتماع عام، لكن ما عندناش.

أنتوا يظهر من النوع اللي بيتضِّحك عليه. فأرجو تكونوا شاطرين عن كده وعينيكم مفتحة، ولو واحد اقتحم بيتكم وأذاكم هذه الأذية، كنت تروح ماسكه وتضرب تليفون للبطرخانة ويجيوا يقبضوا عليه، يقبضوا عليه كنسيًا يعني.

^{[1] سؤال أجاب عنه قداسة البابا شنوده في عظة بعنوان “المحبة تحتمل كل شيء” بتاريخ 5 أغسطس 1992م}