سؤال واحدة بيتقول هل تعترف على الماضي بتاعها على خطيبها؟

سؤال:

واحدة بتقول: يعني بلاش المقدمة الطويلة علشان ما نخشش في تعريفها، هل بتعترف على الماضي بتاعها على خطيبها؟ [1]

الإجابة:

لأ. هو بيتسلمها من النهارده، اعترافها على أب اعترافها، لكن يجي الخطيب يقول لها: أنا هقول لك وأنتِ تقولي لي، وبعدين يقولها أي حاجة، ويخليها تقول له ولا يغفر لها إطلاقًا. أنا عارف الرجالة وعارف طَبعهم، حتى حتى إن غفر لك حاجة أو تظاهر بالغفران يقعد يعايرك بيها طول العمر، وممكن يتقلب.

أنتِ ما تضمنيش الرجالة. الرجالة ما يزعلوش.

يعني اللي حاصل كده، يعني خطاياكي بينك وبين أب اعترافك، ما يجيش يقول لك: أنتِ ماضيكِ إيه؟ قولي له: أنا نشكر ربنا الحمد الله، كل حاجاتي بقولها لأب اعترافي، يقول لك: قولي لي أنا كمان، قولي له: ما حبش يكون ليّ اتنين أب اعتراف وبس.

وقولي له مفروض إن إحنا نكوّن علاقة على أساس من الثقة، فإذا كنت أنت من أول دلوقتي هتقعد تقولي إيه وماضيكِ وبتاع؟ مش جو ثقة ده يبقى جو ثقل مش ثقة.

^{[1] سؤال أجاب عنه قداسة البابا شنوده في عظة بعنوان “المحبة تحتمل كل شيء” بتاريخ 5 أغسطس 1992م}